ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: Դատական համակարգում ծանրաբեռնվածությունը թեթևացնելու համար  նոտարի լիազորություններն ընդլայնվելու են: «Արմենպրես»-ի հաղորդմամբ` հուլիսի 11-ին լրագրողների հետ հանդիպման ժամանակ ասաց ՀՀ արդարադատության նախարարի տեղակալ Սուրեն Քրմոյանը:

«Իրավաբանական նշանակություն ունեցող փաստերի հաստատման հետ կապված գործառույթներն  ընդլայնվելու են: Նոտարները հնարավորություն են ունենալու վկայի ցուցմունքները հաստատել, ինչպես նաև քրեական պատասխանատվություն կնախատեսվի նոտարի մոտ կեղծ ցուցմունք տալու համար»,- ընդգծեց Քրմոյանը:

ՀՀ արդարադատության նախարարի տեղակալը նշեց նաև, որ էլեկտրոնային լայնածավալ համակարգ է ներդրվում նոտարիատում, որը կապվելու է տարբեր համակարգերի հետ: «Օրինակ` վավերացնում է գործարքը, և նոտարը հնարավորություն է ունենալու ստուգելու տվյալ անձն ամուսնացած է, թե ոչ, արգելանք ունի, թե ոչ և այլն: Նոտարին տրվելու են լիազորություններ էլեկտրոնային մեկ պատուհանի եղանակով աշխատելու համար»,- եզրափակեց Քրմոյանը: