ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: Հայկական ատոմային էլեկտրակայանի երկրորդ էներգաբլոկի շահագործման ժամկետի երկարաձգման աշխատանքները նախատեսվում է ավարտին հասցնել 2019թ.: Ազգային ժողովի տնտեսական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում ՀՀ 2016թ. պետական բյուջեի կատարման հաշվետվության քննարկման ժամանակ այս մասին հայտնեց ՀՀ էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանը:

«Ռուսաստանի Դաշնության կառավարության աջակցությամբ 2016թ. շարունակվել են հայկական ատոմային էլեկտրակայանի երկրորդ էներգաբլոկի շահագործման նախագծային ժամկետի երկարաձգման աշխատանքները, որը նախատեսվում է ավարտել 2019թ.»,- «Արմենպրես»-ի փոխանցմամբ՝ նշեց նա:

2016թ. շարունակվել և ամբողջությամբ ավարտին է հասցվել Իրանի Իսլամական Հանրապետության կառավարության աջակցությամբ իրականացված Մեղրի և Ագարակ քաղաքների գազի բաշխման ցանցի կառուցման դրամաշնորհային ծրագիրը: