Վաչե Գաբրիելյանի գլխավորած պատվիրակությունը մասնակցում է Պետերբուրգի միջազգային տնտեսական համաժողովին
ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: Մեկնարկել է Պետերբուրգի միջազգային տնտեսական համաժողովը:Այս տարի համաժողովին մասնակցում են 12 հազար մասնակիցներ, ներառյալ արտասահմանյան երկրների նախարարներ և ընկերությունների ղեկավարներ: Հայաստանի Հանրապետությունից համաժողովին մասնակցում է ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանի գլխավորած պատվիրակությունը: Այս մասին «Արմենպրես»-ին տեղեկացրին ՀՀ կառավարության տեղեկատվության և հասարակայնության հետ կապերի վարչությունից:
ՊՄՏՀ-ի հիմնական միջոցառումները կկայանան հունիսի 1-ից 3-ը:
Հունիսի 1-ին ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը մասնակցել է Եվրոպական և Եվրասիական ինտեգրում թեմայով քննարկմանը, որտեղ հանդես է եկել ելույթով:
ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը իր ելույթում նշել է, որ Հայաստանը դիտարկում է Եվրոպական և Եվրասիական ինտեգրման գործընթացները որպես փոխլրացնող և ձգտում է դրանց հաջող համադրման միջոցով ձևավորել ձևաչափեր, որոնք կիրառելի կլինեն ավելի լայն մաշտաբով՝ ամբողջ Եվրասիական տարածքում:
Հունիսի 2-ին նախատեսված է ՀՀ կառավարության Ռազմավարական նախաձեռնությունների կենտրոնի կողմից մշակված «Հայաստանի զարգացմանն ուղղված բարեփոխումները և նոր հնարավորությունները» թեմայով շնորհանդեսը:
Բաժանորդագրվեք մեր ալիքին Telegram-ում