Տեսաֆիլմերը և խաղերը կարող են լեզուն արագ սովորելու լավ միջոց լինել
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: «Լեզուների եվրոպական օրվա» շրջանակում ԵՊԼՀ-ի բակում տեղի ունեցավ այդ օրվան նվիրված տոնավաճառ և համերգային ծրագիր: «Հրավիրել ենք Երևանի միջնակարգ և ավագ դպրոցների աշակերտների: Ներկայացնում ենք Բրյուսովի համալսարանում դասավանդվող 22 օտար լեզուները և կրթական ծրագրերը»,-«Արմենպրես»-ի հաղորդմամբ` նշեց ԵՊԼՀ կարիերայի կենտրոնի ղեկավար Լևոն Բաբամյանը:
ԵՊԼՀ-ն իրականացնում է ոչ ֆորմալ կրթության ծրագիր` համագործակցելով «Եվրոպական կամավորական ծառայության» հետ: Հրավիրվում են տարբեր երկրներից երիտասարդներ, որոնք, մեկ տարվա ընթացքում ապրելով Հայաստանում, ուսանողներին ծանոթացնում են իրենց մշակույթին և պատմությանը: Այս տարի ներկա էր կամավորական նաև Խորվաթիայից:
«Սիրով Խորվաթիայից եկել եմ Հայաստան իմ լեզվին և պատմությանը հայերին ծանոթացնելու նպատակով»,-ասաց կամավորականը:
Գերմանիայից Հայաստան ժամանած Աննան ընդգծեց, որ Հայաստանում գերմաներենի նկատմամբ հետաքրքրությունը բավականին մեծ է, և ինքը տեսաֆիլմերի, տարբեր խաղերի միջոցով կարողանում է լեզուն հստակ մատուցել ուսանողներին և աշակերտներին:
«Ամեն տարի 5 կամ 6 կամավորական է գալիս մեզ մոտ: Իրենց երկիր վերադառնալով` նրանք պարբերաբար Հայաստանին առնչվող հոդվածներ են գրում: Վերջերս Հայոց Ցեղասպանությանը նվիրված հոդված էին հրատարակել Լեհաստանում: Կամավորականները իրենց երկրում Հայաստանի դեսպաններ են դառնում»,-շեշտեց ուսանողության, երիտասարդության և հասարակայնության հետ կապերի գծով պրոռեկտոր Ցոլակ Ակոպյանը:
Ուսանողները միջոցառմանը շատ ակտիվ էին: Նրանք հանդես եկան տարբեր ժամանակակից պարային համարներով` աշխուժացնելով անգամ դասախոսներին:
«Լեզուների եվրոպական օր» ամենամյա նախագիծն իրականացվում է 2001թ.: Ծրագրի նպատակն է աջակցել լեզվական բազմազանությանը, աշխարհում տարբեր լեզուների դասավանդման զարգացմանը: Այն հիմնվել է Եվրոպայի խորհրդի կողմից:
Հաջորդ ամիս նման ծրագիր կանցկացվի նաև Գորիսում և Կապանում:
Բաժանորդագրվեք մեր ալիքին Telegram-ում