ԵՐԵՎԱՆ, 6 ՕԳՈՍՏՈՍԻ, ԱՐՄԵՆՊՐԵՍ: Իրանի հոգեւոր առաջնորդ այաթոլլահ Ալի Խամենիի՝ միջազգային հարցերով գլխավոր խորհրդական եւ նախկին արտգործնախարար Ալի Աքբար Վիլայեթին Թեհրանում անցկացված գիտաժողովում հայտարարել է, որ Իրանն Ադրբեջանում հանդիպել է «թշնամիների ծայրահեղ պահանջներին»:

Ինչպես հաղորդում է «Արմենպրես»-ը` վկայակոչելով Իրանի կիսապաշտոնական «Մեհր» լրատվական գործակալությունը, Երկրորդ միջազգային սահմանադրական հեղափոխության գիտաժողովում ունեցած ելույթում նշելով, որ սիրիացիները չընկան «ԱՄՆ-ի եւ տարածաշրջանում հետադիմական վարչակարգերի» թակարդը, Վիլայեթին ասել է. «Իրանը հատկապես Ադրբեջանում, առերեսվել է թշնամիների անսահման պահանջներին եւ չնայած դրան, այժմ գտնվում է Իսլամական Հանրապետության իմաստուն ղեկավարության գլխավորությամբ զարգացման ճանապարհին»:

Վիլայեթին չի մանրամասնել, թե ինչ թշնամիների է հանդիպել Ադրբեջանում:

Վիլայեթին հավելել է, որ Իրանն անտարբեր չի մնալու տարածաշրջանում այլ երկրների ճակատագրին: Նրա խոսքով` տարածաշրջանի երկրների հետ համերաշխությանը հետեւելուց բացի, ելենելով իր ազգային անվտանգության շահերից, Իրանն «առանց նախապայմանների» պետք է օգնություն ցուցաբերի այդ երկրներին:

Իրանի կրոնական առաջնորդի խորհրդականը Սիրիայում ճգնաժամի համար մեղադրել է ԱՄՆ-ին եւ տարածաշրջանում նրա «խաղալիք» հանդիսացող Քաթարին:

«Իրանն աջակցում է Եմենի, Իրաքի եւ Սիրիայի հասարակություններին», -ասել է Վիլայեթին` ակնարկելով տարածաշրջանում շիաներին արվող Թեհրանի աջակցային քաղաքականությունը: