Դուդուկահար Ջիվան Գասպարյան կրտսերը հանրությանը կներկայացնի իր առաջին ձայնասկավառակը
ԵՐԵՎԱՆ, 6 ՓԵՏՐՎԱՐԻ, ԱՐՄԵՆՊՐԵՍ: Դուդուկահար Ջիվան Գասպարյան կրտսերը փետրվարի 8-ին հանրությանը կներկայացնի իր առաջին ձայնասկավառակը: Ինչպես «Արմենպրես»-ին տեղեկացրին Երևանի «Յանս» երաժշտական ակումբից, ձայնասկավառակի շնորհանդեսը կուղեկցվի նաև էթնո-ջազ համերգային ծրագրով:
Roots խորագրով ձայնասկավառակում ներկայացված են դուդուկահարի կատարմամբ տարբեր ստեղծագործություններ:
Ջիվան Գասպարյան կրտսերը, ով հանրահայտ երաժիշտ Ջիվան Գասպարյանի թոռն է, հանդես է գալիս պապի անունը կրող դուդուկահարների քառյակում: Մանուկ հասակից հաճախել է դաշնամուրի դասերի և վոկալի դպրոց: Միևնույն ժամանակ դուդուկ է սովորել պապի մոտ: Փոքր հասակում տեղափոխվել է Լոս Անջելես: Ավելի ուշ միացել է «Վիզա» խմբին: 2001թ. հյուրախաղերով շրջագայել է ԱՄՆ-ում, Եվրոպայում, Կանադայում: Մի քանի տարի անց մի շարք երկրներում հանդես է եկել պապի հետ: 2009թ. Աբու Դաբիում մասնակցել է Womad փառատոնին: Գասպարյան ավագի հետ կատարել է դուետներ «Գլադիատոր» ֆիլմում: 2008թ. Լոնդոնում մասնակցել է Նելսոն Մանդելայի 90-ամյակի տոնակատարությանը: 2009թ. Լոնդոնի ֆիլհարմոնիկ նվագախմբի հետ հանդես է եկել համերգով`արժանանալով արքայազն Չարլզի ուշադրությանը: 2008թ. մասնակցել է պապի 80-ամյակին նվիրված տոնակատարությանը, կատարել դուդուկի տրիո: Կատարումներ է ունեցել Ձուկերոյի, Անդրեաս Վոլենվայդերի, Բորիս Գրեբենշչիկովի, «Ալան Փերսոնս Փրոջեքթի», «Պլանետ Իքսի», Միշել Բրուքի և այլ հայտնի երաժիշտների հետ: 2011թ. նվագել է միջազգային փառատոնում, որին մասնակցել են ավելի քան 300 երաժիշտներ 51 տարբեր երկրներից. այստեղ նրա կատարումն արժանացել է ՅՈՒՆԵՍԿՕ-ի մրցանակին: 2011թ. դուդուկի փառատոնում արժանացել է 1-ին մրցանակի և ոսկե մեդալի:
Բաժանորդագրվեք մեր ալիքին Telegram-ում