ԵՐԵՎԱՆ, 19 ՆՈՅԵՄԲԵՐԻ, ԱՐՄԵՆՊՐԵՍ: Սպարտակը համանուն բալետում նոր մարմնավորում կստանա: Բավարիայի պետական բալետի առաջատար մենապարող Տիգրան Միքայելյանը նոյեմբերի 29-ին հանդես կգա Ալ. Սպենդիարյանի անվան օպերայի և բալետի ազգային ակադեմիական թատրոնում: Ինչպես «Արմենպրես»-ին տեղեկացրին օպերային թատրոնի լրատվական բաժնից, Միքայելյանը Արամ Խաչատրյանի «Սպարտակ» բալետում կմարմնավորի գլխավոր հերոսին` Սպարտակին:

Գերմանաբնակ Տիգրան Միքայելյանը մասնագիտական կրթություն է ստացել Երևանի պարարվեստի ուսումնարանում` 1989-1997թթ.: 1997 թ. Նուրիևի հիմնադրամից ստացել է կրթաթոշակ, որից հետո ուսումը շարունակել է Շվեյցարիայի բալետի ակադեմիայում: Ակադեմիան ավարտելուց հետո 1998թ. ընդունվել է Ցյուրիխի բալետ, ապա 1999թ. դարձել է մենապարող, իսկ 2003-ին՝ առաջին կարգի մենապարող:

2005-2006 թատերաշրջանում ընդունվել է Բավարիայի պետական բալետ և այնուհետև 2007-2008 թատերաշրջանից դարձել է բալետի առաջատար մենապարողը:

2007թ. Տիգրան Միքայելյանը հայրենիքում արժանացել է Հայաստանի վաստակավոր արտիստի  կոչման: Նույն տարի ստացել է Münchner Merkur-ի թատերական մրցանակը: Մի շարք այլ միջազգային մրցանակների դափնեկիր է: Միքայելյանը գլխավոր դերեր է մարմնավորում ինչպես դասական, այնպել էլ ժամանակակից բալետներում:

«Սպարտակն» Արամ Խաչատրյանը գրել է 1945 թվականին: Առաջին անգամ բեմադրվել է 1956 թվականին Լենինգրադի Մարիինյան օպերայի և բալետի թատրոնում: Բալետը մեր օպերային թատրոնի խաղացանկի անբաժանելի մասն է: