Ո՞ վ էր նա, եթե ոչ մարդկային հոգիների ճարտարապետ. ԵՃՇՊՀ-ն ցավակցական հեռագիր է հղել Լևոն Անանյանի մահվան կապակցությամբ
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի ճարտարապետության և շինարարության պետական համալսարանի ուսանողները և դասախոսները ցավակցական հեռագիր են հղել Հայաստանի գրողների միության նախագահ Լևոն Անանյանի մահվան կապակցությամբ: «Արմենպրես»-ի հաղորդմամբ` ԵՃՇՊՀ-ի ցավակցական հեռագրում, մասնավորապես, ասված է.
«Հայաստանի գրական աշխարհը ծանր կորուստ ունեցավ. կյանքից հեռացավ Գրողների միության նախագահ, մշակույթի վաստակավոր գործիչ, գրող, հրապարակախոս Լևոն Անանյանը: Մարդ, ով իր կենսուրախ ժպիտով ու լավատեսությամբ հուսադրում էր մարդկանց: Մարդ, ով հայրենասիրությամբ ոգևորում էր շրջապատին: Մարդ, ով իր մարդասիրությամբ համախմբում էր մարդկանց: Մարդ և գրող, ով մեծ ավանդ ունեցավ նաև միջազգային գրականությանը հայերիս հաղորդակցելու գործում:
Մեծ և անգնահատելի է Լևոն Անանյան մարդու, ստեղծագործողի և ղեկավարի դերը ոչ միայն գրական, այլև քաղաքացիական մտածողության ձևավորման մեջ:
Երևանի ճարտարապետության և շինարարության պետական համալսարանի ուսանողներն ու դասախոսները խորապես ցավում են մեծ մտավորականի անդառնալի կորուստը»:
Բաժանորդագրվեք մեր ալիքին Telegram-ում