Ժամանակը Երևանում՝ 11:07:36,   23 Սեպտեմբեր

Օրինագծի ստորագրման համար Սարկոզիի առաջ սահմանադրական որեւէ խոչընդոտ չկա


ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ:  Հայոց ցեղասպանության ժխտումը քրեականացնող օրինագծի ստորագրման համար Ֆրանսիայի նախագահ Նիկոլա Սարկոզիի առաջ սահմանադրական որեւէ խոչընդոտ չկա: Ինչպես «Արմենպրես»-ի հետ զրույցում նշեց ՀՅԴ Հայ դատի Փարիզի գրասենյակի տնօրեն Հրաչ Վարժապետյանը, Սահմանադրության հիման վրա նա 15 օրից մեկ ամիս ժամանակ ունի ստորագրելու օրինագիծը: «Մինչեւ նախագահական շրջանի ավարտը նա, այսպես ասած, պարտավոր է ստորագրելու, քանի որ չստորագրելու խնդիր չկա: Օրենքի ձախողման պարագայում կամ սահմանադրական որեւէ պահանջի դեպքում վերջում բոլոր հարցերը վերադառնում են Ազգային ժողով»,-ասաց Վարժապետյանը:

Անդրադառնալով թուրքամետ սենատորների հետ համագործակցությունը շարունակելու եւ Ֆրանսիայի Սահմանադրական դատարան դիմելու Թուրքիայի վարչապետ Ռեջեբ Թայիփ Էրդողանի հայտարարությանը, Վարժապետյանն աբսուրդ համարեց դատական բարձրագույն այդ մարմնին դիմելու հնարավորությունը: «Սահմանադրական դատարանը միջամտելու իրավունք չունի, քանի դեռ սահմանադրական խնդիր չկա: Խորհրդարանի երկու պալատները որոշել են, վավերացրել, Սահմանադրական ատյանի խնդիր չկա, քանի դեռ նախագահն այն չի ստորագրել որպես օրենք»,-ասաց Հայ դատի` Փարիզի գրասենյակի տնօրենը:

Նա նշեց, որ օրինագծի քննարկման ընթացքում հայերի կողմից կազմակերպվածը զորակցական հավաք էր` նվիրված Ֆրանսիայի եւ Հայաստանի Հանրապետություններին, Ֆրանսիայի ծերակույտին: Մինչդեռ թուրքական ցույց շատ արագ ցրվեց` քննարկման արդյունքների պարզ դառնալուց հետո: «Սենատի առջեւ հավաքվել էին հազարավոր հայորդիներ, իսկ երկու փողոց այն կողմ` թուրքերը հազիվ 200 հոգի կլինեին: Թուրքական ցույցի մեջ երեւում էին նաեւ ադրբեջանական դրոշակներ, ինչը փառասիրական նպատակ ուներ. նրանք եւս մեկ անգամ ցույց տվեցին, որ Ադրբեջանը եւ Թուրքիան մեդալի երկու երեսներն են, նույն թուրքն են, նույն ցեղը` պարզապես տարբեր պետություններով»,-նշեց Վարժապետյանը:




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ