ՀՀ դեսպան Ա.Խաչատրյանը հանդիպել է Բելառուսի հայկական համայնքային կազմակերպությունների ղեկավարներին
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Բելառուսում Հայաստանի դեսպանությունում նոյեմբերի 2-ին տեղի է ունեցել Հայաստանի դեսպան Արմեն Խաչատրյանի հանդիպումը Բելառուսի հայկական համայնքային կազմակերպությունների ղեկավարների հետ: Հանդիպման հիմնական նպատակն էր նոյեմբերի 20-ին Մինսկում կայանալիք մանկական Եվրոտեսիլի արդյունավետ կազմակերպումը եւ Հայաստանը ներկայացնող Վլադիմիր Արզումանյանին պատշաճ ներկայացնելը:
Ինչպես «Արմենպրես»-ին տեղեկացրին ՀՀ ԱԳՆ մամուլի, տեղեկատվության եւ հասարակայնության հետ կապերի վարչությունից, նոյեմբերի 12-ին Մինսկում դեսպանության ու համայնքի ուժերով կազմակերպվելու է համերգ, որտեղ հրավիրված են լինելու Բելառուսում հավատարմագրված դիվանագիտական առաքելության ղեկավարները, Բելառուսի իշխանությունները, հայկական համայնքի ներկայացուցիչները:
Բելառուսում հայ աստղերը նվիրելու են իրենց ելույթները Վլադիմիր Արզումանյանին: Հանդիպման ընթացքում նաեւ ամփոփվել են ընթացիկ տարում կատարված աշխատանքները, քննարկվել են համայնքային կազմակերպությունների արդի խնդիրները եւ ծրագրերը, նախանշվել են գալիք տարվա համագործակցության ուղիները ու աշխատանքների համակարգման եղանակները: Հայկական կազմակերպությունների ղեկավարները համառոտ ներկայացրել են իրենց գործունեության ոլորտները եւ տեսակետները դեսպանության հետ համագործակցության բարելավման ուղղությամբ:
Զրույցի ընթացքում Բելառուսի համայնքային կազմակերպությունների ղեկավարներն շնորհակալություն են հայտնել դեսպան Խաչատրյանին Բելառուսի համայնքային կազմակերպություններին դեսպանության կողմից ավանդաբար ցուցաբերվող աջակցության համար: Արմեն Խաչատրյանը ներկայացրել է իր մոտեցումները դեսպանության եւ համայնքային կազմակերպությունների համագործակցության վերաբերյալ` նշելով հետագա համագործակցության արդյունավետության բարձրացման հնարավորությունները:
Բաժանորդագրվեք մեր ալիքին Telegram-ում