Չինական բանկը դադարեցրել է Ռուսաստանի և Բելառուսի հետ գործառնությունները
ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: Չինական Chouzhou Commercial Bank-ը դադարեցրել է գործառնությունները ռուսաստանցի և բելառուսցի հաճախորդների հետ: «Արմենպրես»-ի փոխանցմամբ՝ այս մասին հաղորդում է «Վեդոմոստի»-ն` վկայակոչելով աղբյուրների:
«Բանկի մենեջերներն անցյալ շաբաթ հաճախորդներին ծանուցել են ցանկացած ռուսական կամ բելառուսական կազմակերպության հետ հարաբերությունների դադարեցման մասին», - հայտարարել են հրատարակության զրուցակիցները։
Ընկերություններից մեկի սեփականատերը նշել է, որ իր կազմակերպությունն արդեն մի քանի գործարք է խափանել չինական բանկի որոշման պատճառով։
Ինչպես պնդում է հրատարակությունը, մոտեցող չինական Նոր տարվա և երկարատև հանգստյան օրերի պատճառով վճարումների դադարեցումն սպառնում է լոգիստիկ կոլապսով։
«Առնվազն մինչև մարտ ամիս հնարավոր չի լինի ապրանքներ ներկրել երկարատև հանգստյան օրերի պատճառով», - ասվում է հրապարակման մեջ։
ԱՄՆ նախագահ Ջո Բայդենը դեկտեմբերին հրամանագիր է ստորագրել, որն ընդլայնում է իրավական հիմքերը Ռուսաստանի դեմ պատժամիջոցների սահմանման համար։ Օտարերկրյա բանկերն այժմ կարող են ենթարկվել սահմանափակումների, եթե Վաշինգտոնը գտնի, որ նրանք աջակցում են ռուսական ռազմարդյունաբերական համալիրին։
Բաժանորդագրվեք մեր ալիքին Telegram-ում