388.16
Մի խումբ արցախցիներ ակցիա են իրականացնում ՌԴ խաղաղապահների տեղակայման վայրում՝ փակելով մուտքերից մեկը
1 րոպեի ընթերցում
ՍՏԵՓԱՆԱԿԵՐՏ, 16 ՕԳՈՍՏՈՍԻ, ԱՐՄԵՆՊՐԵՍ։ Արցախի մի խումբ քաղաքացիներ օգոստոսի 15-ի գիշերվանից խաղաղ ակցիա են իրականացնում Ստեփանակերտի օդանավակայանում, որտեղ ավտոմեքենայով փակել են ռուս խաղաղապահների տեղակայման վայրի մուտքը:
«Արմենպրես»-ի թղթակցի հետ զրույցում «Միջանցքի ապաշրջափակման ժողովրդական շարժման» նախաձեռնող խմբի անդամ Արթուր Օսիպյանը նշեց, որ իրենց պահանջը Լաչինի միջանցքի ապաշրջափակումն է և այդ նպատակով դեպի Հակարի նախատեսվող խաղաղ ավտոերթի անվտանգության ապահովումը:
«Մինչ այս էլ էինք մենք նամակով դիմել խաղաղապահներին: Մենք ոչ թե ասում ենք գնացեք դուք ապաշրջափակեք, այլ պահանջում ենք ապահովել մեր խաղաղ երթի անվտանգությունը դեպի Հակարիի կամուրջ և փորձենք միասնական այդ հարցը լուծել:Սակայն նամակին աբսուրդային պատասխան են տվել: Ի նշան բողոքի՝ ուղղակի գնացել և փակել ենք նրանց տեղակայման վայրի մուտքը մինչև մեզ լուրջ վերաբերվեն ու չփորձեն այնպես անել, որ մեր նպատակից հրաժարվենք»,-մանրամասնեց Օսիպյանը: Նա կոչ է արել արցախցիներին այսօր երեկոյան միանալ ակցիային:
ՌԴ խաղաղապահները ճանապարհը բացելու փորձ են ձեռնարկել, սակայն այն շարունակում է փակ մնալ։
Վան Նովիկով
