ԳԱՎԱՌ, 29 ԴԵԿՏԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի համայնքների բյուջեների սեփական եկամուտները 2022 թվականի դեկտեմբերի 27-ի դրությամբ հավաքագրվել են 99,1 տոկոսով։

Ինչպես տեղեկացրին Գեղարքունիքի մարզպետարանի ֆինանսական եւ սոցիալ-տնտեսական զարգացման վարչությունից, պլանավորված 2 միլիարդ 514 միլիոն դրամի դիմաց փաստացի հավաքագրվել է 2 միլիարդ 481 միլիոն 22 հազար դրամ, իսկ նախորդ տարվա նույն ժամանակահատվածի համեմատ արձանագրվել է ընդամենը 0,1 տոկոսի չափով նվազում։

Մարտունի համայնքը սեփական եկամուտները հավաքագրել է 108,3, Ճամբարակ համայնքը՝ 104, Սեւան համայնքը՝ 98,5,  Գավառ համայնքը՝ 93, Վարդենիս համայնքը՝ 91 տոկոսով։

Մարզխորհրդի տարեվերջյան նիստում Գեղարքունիքի մարզպետ Կարեն Սարգսյանը հրահանգել է համայնքների եւ բնակավայրերի վարչական ղեկավարներին՝ տարին փակել 100 տոկոսանոց արդյունքով։

«Սեփական եկամուտների հավաքագրման արդյունքներից է կախված պետական բոլոր ծրագրերի իրականացման հավանականությունը։ Եվ այդ ծրագրերը կիրականացվեն ճիշտ այն ծավալներով, ինչ ծավալներով որ հավաքագրված կլինեն սեփական եկամուտները։ Բնակավայրերի վարչական ղեկավարները պետք է առավել հետեւողական աշխատանք տանեն, որպեսզի սեփական եկամուտների հավաքագրումը իրականացվի ամբողջությամբ»,-ասել է մարզպետը։

Խոսրով Խլղաթյան