Սպորտը՝ առողջ ապրելակերպի աղբյուր. հայտնի են «Վարչապետի գավաթի» սիրողական լողի մրցաշարի հաղթողները

ՍԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: Սևանում Շողակաթ համայնքին հարակից լողափնյա տարածքում կայացավ «ՀՀ վարչապետի գավաթ» սիրողական լողի մրցաշարը: Հայտնի են հաղթողների անունները:

«Արմենպրես»-ի թղթակցի հաղորդմամբ՝ «ՀՀ վարչապետի գավաթ» սիրողական լողի մրցաշարին մասնակցեցին 120 հոգի՝ տղամարդկանց և կանանց 2 տարիքային խմբերում: Մրցաշարին մասնակցել են նաև օտարերկրյա քաղաքացիներ՝ 6 կին և 5 տղամարդ:

Մրցաշարին տարիքային երկու խմբերում 1-10-րդ տեղեր գրաված մասնակիցները ստացել են դրամական պարգևներ և ՀՀ կրթության, գիտության, մշակույթի և սպորտի նախարարության համապատասխան կարգի հավաստագրեր, իսկ 1-ին, 2-րդ և 3-րդ տեղեր գրաված մասնակիցները (տղամարդիկ և կանայք) պարգևատրվել են նաև գավաթներով և մեդալներով:

1-ին տեղը զբաղեցրած մասնակիցները ստացել են 1 միլիոն ՀՀ դրամ, 2-րդ տեղը՝ 600 հազար ՀՀ դրամ, 3-րդ հորիզոնականը՝ 400 հազար ՀՀ դրամ, 4-րդ տեղը՝ 150 հազար ՀՀ դրամ, 5-րդ տեղը՝ 100.000 ՀՀ դրամ, 6-10-րդ տեղերը՝ 75.000 ՀՀ դրամ. հարկերը, տուրքերը և պարտադիր վճարները ներառված չեն, ծախսերը կատարվում են ՀՀ պետական բյուջեից հատկացված միջոցների հաշվին:

Կանանց 18-35 տարիքային խմբում հաղթել է գյումրեցի Անի Ավետիսյանը, երկրորդ տեղում է Անահիտ Բարսեղյանը, եռյակը եզրափակել է Էլեն Պողոսյանը:

Տղամարդկանց 18-ից 40 տարիքային խմբում եռյակում են՝ Մկրտիչ Ոսկանյանը՝ առաջին տեղ, Արամ Մալթակյանը՝ երկրորդ տեղ, և Ստեփան Ադամյանը՝ երրորդ տեղ:

Կանանց ավագ տարիքային խմբում առաջին երեք տեղերը զբաղեցրել են Մարգարիտա Խոստիկյանը, Գոհար Սարգսյանը և Ռուզաննա Հովասափյանը, իսկ տղամարդկանց պայքարում՝ Անդրանիկ Խաչատրյանը, Արմեն Հանեսօղլյանը և Վիկտոր Խուդավերդյանը:

Կանանց 18-ից 35 տարեկանների խմբում առաջին տեղ զբաղեցրած գյումրեցի 26 տարեկան Անի Ավետիսյանը նշեց, որ լողով զբաղվում է սիրողական, բայց, բացի լողից, նաև հաճախում է տարբեր այլ մարզաձևերի:

«Շատ ոգևորված եմ և խորհուրդ եմ տալիս բոլորին մասնակցել. առաջինը նման մրցաշարը շատ մեծ մոտիվացիայի աղբյուր է և երկրորդ՝ առողջ ապրելակերպ է»,-եզրափակեց Անի Ավետիսյանը:

Կանանց 36 տարեկանից բարձր խմբի մասնակից, «Արմենպրես» պետական լրատվական գործակալության հատուկ նախագծերի և մամուլի սրահի պատասխանատու Աննա Գզիրյանը նշեց, որ «Վարչապետի գավաթի» լողի մրցաշարին սպասել ու պատրաստվել է գրեթե մեկ տարի, որտեղ զբաղեցրել է 8-րդ տեղը՝ Սևանում հաղթահարելով 1000 մետր տարածությունը

«Մրցումներին պատրաստվել սկսել եմ նախորդ տարվա սեպտեմբերից։ Ինձ ոգևորեց ու ոգեշնչեց իմ գործընկեր Վարվառա Հայրապետյանը, ով մասնակցում էր Վարչապետի գավաթի վազքի մրցաշարին։ Մեկ տարի հետևողական աշխատել եմ ու այսպիսի արդյունք գրանցել։ Կարծում եմ՝ ես էլ կոգեշնչեմ մյուսներին, ովքեր կուզենան մասնակից դառնալ այս սիրուն սպորտային տոնին»,- ասաց Աննա Գզիրյանը:

Կանանց և տղամարդկանց շրջանում ամենատարեց մասնակիցներ 73- ամյա Հասմիկ Քանքանյանը և 81-ամյա Հակոբ Թութանջանյանը նույնպես պարգևատրվեցին վարչապետի կողմից հատուկ մրցանակով և վարչապետի հիմնադրամից 200 հազար դրամ դրամական պարգևով:

Պարգևատրելով մասնակիցներին՝ ողջույնով մասնակիցներին դիմեց ՀՀ վարչապետ Նիկոլ Փաշինյանը՝ կարևորելով սպորտի և առողջ ապրելակերպի զարգացումը:

«Ուզում եմ նախ ևս մեկ անգամ շնորհավորել բոլոր հաղթողերին և շնորհակալություն հայտնել բոլոր մասնակիցներին՝ առաջին հերթին այս մթնոլորտի համար: Պիտի անկեղծ խոստովանեմ, որ այո, իրոք կար պահ, երբ մտածում էինք, թե մեզ չի հաջողվի իրականացնել «Վարչապետի գավաթ» լողի մրցաշարը, այն էլ Սևանա լճում: Քննարկում էինք և մտավախություն ունեինք, որ հնարավոր է մասնակիցների թիվը մինիմալ լինի: Ի վերջո քննարկումների արդյունքում որոշեցինք, որ եթե նույնիսկ մեկ մարդ մասնակցի՝ հանուն այդ մեկ մարդու արձագանքի պետք է մրցաշարն իրագործենք: Չնայած, ավելի քան 130 մասնակից ունենալը շատ լավ ցուցանիշ է, բայց մեր խնդիրն է այնպես անել, որ ամեն տարվա հետ մասնակիցներն ավելի շատանան»,- ասաց Նիկոլ Փաշինյանը:

Վարչապետն ընդգծեց, որ իրենց հաջորդ խնդիրն է՝ ի վերջո ևս մեկ անգամ այս միջոցառմամբ ուշադրություն հրավիրել Սևանա լճի, դրա զբոսաշրջային հնարավորությունների և, մասնավորապես, այս ափի՝ արևելյան ափի ներուժի վրա, նաև, իհարկե, հնարավորություն ստեղծել, որպեսզի մեր սիրելի հայրենակիցները մրցման մեջ նաև ինքնադրսևորվեն, հնարավորություն ունենան իրենց ուժերը փորձարկել:

««Վարչապետի գավաթ» մրցաշարը կայանում է, և ուզում եմ մի նրբության մասին խոսել: Ցանկանում ենք «Վարչապետի գավաթ»-ի մրցաշարեր իրականացնել այն մրցաձևերից, որտեղ, ըստ էության, հնարավորինս քիչ թանկարժեք ենթակառուցվածքներ անհրաժեշտ կլինեն, որպեսզի բոլոր ցանկացողները կարողանան մարզվել և մասնակցել մրցումներին: Սևանա լիճը, ցավոք, շատ կարճ սեզոնով, բայց մատչելի է բոլորին, բոլորը կարող են լողալ սովորել և պատրաստվել մյուս մրցաշարերին: Այդպես էլ վազքի մրցաշարը, սեղանի թենիսը, չնայած ավելի մեծ ներդրում է պահանջում, սակայն համեմատաբար ավելի մատչելի մրցաձև է, հեծանիվը նույնպես համեմատաբար մատչելի է: Իսկ դպրոցականների խճուղավազք մրցաշարը դառնում է «Վարչապետի գավաթ»-ի շարքի ամենակարևոր, ամենագեղեցիկ անկյունաքարային միջոցառումը»,- եզրափակեց ՀՀ վարչապետը:

ՀՀ ԿԳՄՍ նախարարի տեղակալ Կարեն Գիլոյանն ընդգծեց, որ չէին սպասում, որ այսքան մասնակից կունենան քաղցրահամ Սևանում:

«Խանդավառությունը մեծ էր, կա տոնական տրամադրություն: Վստահ եմ՝ մրցաշարը կծառայի իր նպատակին: Ամեն ինչ անում ենք, որ սպորտը դառնա ավելի մասսայական, մարդիկ ավելի առողջ լինեն», - նշեց ԿԳՄՍ նախարարի տեղակալ Կարեն Գիլոյանը:

Փոխնախարարի հավաստմամբ՝ արվել է ամեն ինչ մրցաշարի մասնակիցների անվտանգությունը լավագույնս ապահովելու համար. Սևանա լճում աշխատում են ՀՀ արտակարգ իրավիճակների նախարարության ջրափրկարարները՝ 6 մոտորանավակներով: