Շիրակի մարզում այս պահի դրությամբ ավերածության վերաբերյալ ահազանգ չի ստացվել
ԵՐԵՎԱՆ, 13 ՓԵՏՐՎԱՐԻ, ԱՐՄԵՆՊՐԵՍ: Երկրաշարժի հետևանքով Շիրակի մարզում ավերածության վերաբերյալ որևէ ահազանգ այս պահի դրությամբ չի ստացվել: «Արմենպրես»-ի հետ զրույցում հայտնեց Շիրակի մարզպետարանի տեղեկատվության և հասարակայնության հետ կապերի բաժնի պետի պարտականությունները կատարող Արաքսյա Կիրակոսյանը:
«Շիրակի մարզպետի հանձնարարությամբ՝ մեր համապատասխան վարչության աշխատակիցները կապ են հաստատել մարզի համայնքների ղեկավարների հետ, որպեսզի ճշտեն ահազանգեր կան, թե ոչ: Այս պահի դրությամբ որևէ ահազանգ, որևէ մտահոգիչ փաստ չի արձանագրվել»,-ասաց Կիրակոսյանը:
Նրա խոսքով՝ Գյումրիի փրկարար ծառայությունը ևս որևէ մտահոգիչ ահազանգ չի ստացել:
ՀՀ արտակարգ իրավիճակների նախարարություն սեյսմիկ պաշտպանության տարածքային ծառայության սեյսմոլոգիական ցանցի կողմից փետրվարի 13-ին տեղական ժամանակով ժամը 11:29-ին (Գրինվիչի ժամանակով` ժամը 15:29-ին) գրանցվել է հյուսիսային լայնության 40.11⁰ և արևելյան երկայնության 44.54⁰ աշխարհագրական կոորդինատներով` Հայաստան` Երևան քաղաքից 8 կմ հարավ-արևելք, օջախի 10 կմ խորությամբ, 4.7 մագնիտուդով երկրաշարժ: Էպիկենտրոնային գոտում ստորգետնյա ցնցման ուժգնությունը կազմել է 6-7 բալ:
Բաժանորդագրվեք մեր ալիքին Telegram-ում