Ժամանակը Երևանում՝ 11:07:36,   21 Հունվար

Այվազյանն ու Լավրովը կարևորեցին գերիների և զոհվածների մարմինների շուտափույթ փոխանակման իրականացումը

Այվազյանն ու Լավրովը կարևորեցին գերիների և զոհվածների մարմինների շուտափույթ 
փոխանակման իրականացումը

ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության Արտաքին գործերի նախարար Արա Այվազյանն ու Ռուսաստանի Դաշնության ԱԳ նախարար Սերգեյ Լավրովը կարևորեցին Արցախյան երկրորդ պատերազմի ընթացքում գերի ընկածների և զոհված զինծառայողների մարմինների շուտափույթ փոխանակման իրականացումը: «Արմենպրես»-ի փոխանցմամբ`այս հարցին նախարարներն անդրադարձան Մոսկվայում կայացած ընդլայնված կազմով հանդիպման ընթացքում:

«Կարևորագույն հարց է գերիների փոխանակման հարցը: Մեր խաղաղապահների միջոցով փորձելու ենք միջնորդել այս հարցի հնարավորինս արագ ավարտին հասցնելուն: Գիտենք, թե դա ինչ սուր հարց է գերի ընկածների հարազատների, մտերիմների, ընկերների համար, ինչպես նաև զոհվածների մարմինների փոխանակման հարցը, որը նույնպես պետք է շուտ լուծել»,- ասաց Լավրովը:

ՀՀ Արտաքին գործերի նախարար Արա Այվազյանը նշեց, որ գերիների փոխանակման հարցն առավել արդիական է այն պարագայում, երբ կան նրանց նկատմամբ անմարդկային վերաբերմունքը ցուցադրող փաստեր:

«Իհարկե, անհետ կորած զինծառայողների որոնման, գերիների և զոհվածների մարմինների փոխանակման հարցը շատ նուրբ է և պահանջում է շուտափույթ լուծում: Դա առավել արդիական է զինծառայողների և ոչ միայն, նկատմամբ բարբարոսական գործողությունների փաստերի առկայության պարագայում»,- նշեց Արա Այվազյանը:

Հայաստանի և Ադրբեջանի ռազմա-քաղաքական ղեկավարությունները համաձայնել են «բոլորը բոլորի դիմաց» գերիների փոխանակման բանաձևին:





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ