Ժամանակը Երևանում՝ 11:07:36,   18 Հունվար

Պատերազմի հետևանքով ավերված Մարտունիում վերականգնման համար շինարարների կարիք է զգացվում

Պատերազմի հետևանքով ավերված Մարտունիում վերականգնման համար  
շինարարների կարիք է զգացվում

ՄԱՐՏՈՒՆԻ, 2 ԴԵԿՏԵՄԲԵՐԻ, ԱՐՄԵՆՊՐԵՍ: Ադրբեջանական զինված ուժերի կողմից Արցախի Մարտունու շրջանի բնակավայրերի հրթիռահրետակոծության հետևանքով  լրիվ կամ մասնակի վնասվել է ընդհանուր առմամբ 1038 բնակելի  տուն: Այս մասին «Արմենպրես»-ի հետ զրույցում տեղեկացրեց շրջվարչակազմի ղեկավարի տեղակալ Վադիմ Դանիելյանը:

«Ընդ որում  հիմնովին ավերվել է 20 տուն: Մեծ վնասներ է հասցվել քաղաքացիական ենթակառուցվածքներին: Այս պահի դրությամբ Մարտունու և հարակից համայնքների էլեկտրամատակարարումը անկայուն և  սահմանափակ ժամանակացույցով  է իրականացվում: Համեմատաբար քիչ են վնասվել գազատար խողովակները: Մարտունու շրջանում ընդհանուր առմամբ 60 տոկոսով գազամատակարարումը վերականգնված է: Ընդ որում՝   շրջկենտրոնում  հատվածաբար,  իսկ գյուղերում՝ գրեթե ամբողջությամբ:  Ավերված շենք -շինությունների վերականգնման համար  ներկայումս պայմանավորվածություններ ունենք երկու շինարարական կազմակերպությունների հետ, սակայն  դեռևս շինարարական աշխատուժի պակաս զգացվում է: Հակառակորդի հրետակոծության հետևանքով  համեմատաբար քիչ վնասներ  են կրել գյուղական բնակավայրերը, որոնց ենթակառուցվածքները վերականգնվել են, իսկ բնակիչները մեծամասամբ  վերադարձել են: Այս պահի դրությամբ  2000 բնակիչ է վերադարձել նաև Մարտունի քաղաք :  Մյուսները սպասում են բնակարանային խնդրի լուծմանը կամ վերադարձի ճանապարհին են: Բնակարանային ապահովման խնդիրը ժամանակավորապես  փորձում ենք լուծել վարձակալման եղանակով: Դեկտեմբերի 1-ին շրջանում  բացվել են 7 համայնքների դպրոցները, իսկ այսօր ևս 5-ը:  Մարտունու ՝  Ադրբեջանի վերահսկողության տակ անցած գյուղերի բնակիչները հիմնականում ապաստանել են   շրջանի մյուս բնակավայրերում, Ստեփանակերտում, մասամբ  նաև Հայաստանի Հանրապետությունում: Փորձում ենք հնարավորինս աջակցել նրանց՝ գոնե  նվազագույն միջոցներով ապահովելու հարցում: Շուտով կպահեստավորենք նաև սննդամթերք բնակչությանը տրամադրելու համար»,- ասաց Վադիմ Դանիելյանը՝ հավելելով, որ պահեստավորել են նաև անհրաժեշտ ծավալով շինանյութ և աշխատուժի առկայության դեպքում վերականգնման աշխատանքները եռուն ընթացք կստանան:

Վան Նովիկով

 





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ