ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: ՀՀ-ում Արցախի կառավարության օպերատիվ շտաբն ամենօրյա կապի մեջ է ՀՀ աշխատանքի և սոցիալական հարցերի նախարարության հետ՝ Հայաստանում ժամանակավոր գտնվող արցախցիների կեցության հարցը կարգավորելու համար: «Արմենպրես»-ի մամուլի սրահում հրավիրված ասուլիսում Արցախի Հանրապետության աշխատանքի, սոցիալական և բնակարանային հարցերի նախարար, ՀՀ-ում Արցախի կառավարության օպերատիվ շտաբի աշխատանքները համակարգող Միքայել Վիրաբյանը նշեց, որ բոլոր բարձրացված հարցերը, ահազանգերը տեղ են հասցվում:

«Ես խնդրում եմ մեր քաղաքացիներին՝ չառաջնորդվել այն սկզբունքով, որ պարտադիր կարգով պետք է տեղավորվեն Երևանում: Նախարարությունը որդեգրել է քաղաքականություն, ըստ որի, Երևանում բնակվելու հնարավորություն է տրվում այն քաղաքացիներին ու նրանց ընտանիքներին, որոնք ունեն խրոնիկ հիվանդություններ, վիրավոր զինվորներ: Նպատակն այն է, որ նրանք կարողանան ստանալ համապատասխան բժշկական օգնություն»,-ասաց Միքայել Վիրաբյանը:  Նա վստահեցրեց, որ այս պահին անօթևան, փողոցում հայտնված քաղաքացի չկա: Բոլորն ապահովվում են կացարանով, դրանք հյուրանոցներ են, հյուրատներ, անհատների բնակարաններ և այլն: Միքայել Վիրաբյանը նշեց, որ արցախցիներին հյուրընկալած ու աջակցած անձանց ֆինանսական հարցերը մեղմելու համար նախագծեր են պատրաստվում: Հյուրանոցների, հյուրատների հետ կապված կոմունալների վճարումները պետությունը կվերցնի իր վրա:

Ի՞նչ ռազմավարություն է մշակվում այն արցախցիների հետ կապված, ովքեր չեն կարող վերադառնալ իրենց բնակավայրեր, քանի որ դրանք հայկական զինված ուժերի վերահսկողության ներքո չեն: Հարցին ի պատասխան, Միքայել Վիրաբյանը հիշեցրեց Արցախի նախագահ Արայիկ Հարությունյանի խոսքը:

«Շուտով բոլորս կհամոզվենք, որ Արցախի Հանրապետությունը դառնալու է բնակվելու համար հաճելի վայր: Այսինքն՝ բոլոր աշխատանքներն այդ ուղղությամբ արվելու են: Ասեմ, որ առաջնահերթության կարգով բնակարանային խնդիրները լուծվելու են Արցախի տարածքում»,-ասաց նա:

Միևնույն ժամանակ Միքայել Վիրաբյանը տեղեկացրեց, որ Արցախում բավական ակտիվ աշխատանքներ են իրականացվում պատերազմի հետևանքները վերացնելու ուղղությամբ: Մասնավորապես, առաջնահերթ աշխատանք է տարվում ենթակառուցվածքների վերականգնման ուղղությամբ՝ ջրամատակարարում, գազամատակարարում, էլեկտրաէներգիա և այլն: Նա համոզմունք հայտնեց, որ 15-20 օրվա ընթացքում մայրաքաղաքում և հարակից շրջաններում այդ հարցերը կարգավորված կլինեն: