Սերժ Թանկյանը Artsakh Song երգով ոգևորել է Արցախում մարտնչող զինվորներին
ԵՐԵՎԱՆ, 28 ՍԵՊՏԵՄԲԵՐԻ, ԱՐՄԵՆՊՐԵՍ: Աշխարհահռչակ ռոք երաժիշտ, System of a down խմբի մենակատար Սերժ Թանկյանը հրապարակել է Artsakh Song երգի չթողարկված տարբերակը` այն նվիրելով հայ զինվորներին, որոնք Ադրբեջանի կողմից սանձազերծված գործողությունների հետևանքով կենաց-մահու կռիվ են մղում թշնամու դեմ:
«Արմենպրես»-ի հաղորդմամբ` երգին կից Թանկյանը «Ֆեյսբուքի» իր պաշտոնական էջում գրառում է արել, որում ասվում է. «Այս ընթացքում, երբ Հայաստանն ու Արցախը պաշտպանվում են Ադրբեջանի նավթաօլիգարխիկ, կոռումպացված ղեկավարության մասշտաբային ագրեսիայից, ես հիշեցի Artsakh Song երգի մասին, որը գրել և թողարկել եմ 2016 թվականին` Ադրբեջանի կողմից հրահրված ագրեսիայից հետո»:
Սերժ Թանկյանն ընդգծել է, որ հրապարակում է երգի չթողարկված տարբերակը: «Հազարամյակներ շարունակ մեր մշակույթը պահպանել է մեր ազգը, և մենք կտեսնենք այս վերջին պայքարը ևս: #artsakhstrong #stopazeriaggression #artsakhisarmenia #stopaliyev»,-եզրափակել է Թանկյանը:
Արցախի ուղղությամբ Ադրբեջանի կողմից սանձազերծված գործողությունների արդյունքում, ճշտված տեղեկություններով, ադրբեջանական կողմն ունի մոտ 200 մարդկային կորուստ: Ադրբեջանական զինուժն ընդհանուր առմամբ կորցրել է 4 ուղղաթիռ, 28 ԱԹՍ, 36 տանկ և հետևակի մարտական մեքենա, ինչպես նաև 2 ինժեներական զրահամեքենա և 11 միավոր զրահատեխնիկա: Արցախի պաշտպանության բանակի ստորաբաժանումների կողմից նախկինում կորցրած մի շարք դիրքերի վերականգնման արդյունքում հակառակորդի մի քանի տասնյակ դիակներ գտնվում են հայկական կողմում։
Բաժանորդագրվեք մեր ալիքին Telegram-ում