Պատանի հանդիսատեսի թատրոնն ընդունել է Ստեփանակերտի Վ. Փափազյանի անվան թատրոնի «Երաժշտական ողջույնը»
ԵՐԵՎԱՆ, 21 ՀՈՒԼԻՍԻ, ԱՐՄԵՆՊՐԵՍ: Ստեփանակերտի Վահրամ Փափազյանի անվան պետական դրամատիկական թատրոնը «Երաժշտական ողջույն» է հղել Երևանի պատանի հանդիսատեսի թատրոնին, որն այն ընդունել է, բայց դեռ հոլովակ չի ներկայացրել:
«Արմենպրես»-ի հաղորդմամբ՝ Պատանի հանդիսատեսի թատրոնի «Ֆեյսբուք»-ի պաշտոնական էջում զետեղվել է Ստեփանակերտի թատրոնի «Երաժշտական ողջույնի» հոլովակը կից գրառմամբ. «Մենք սիրով ընդունում ենք մեր գործընկերների «Երաժշտական ողջույնը»: #մենքմիընտանիքենք
#սպասեքմերողջույնին»:
Ստեփանակերտի թատրոնն էլ, որի ներկայացուցիչները հոլովակում հանդես են գալիս երաժշտական տարբեր կատարումներով, առաջարկում է հերթականությամբ թատրոնից թատրոն ուղարկել «Երաժշտական ողջույնը»: Ողջույնի ձևն ազատ է:
«Երաժշտական ողջույնի» հեղինակները Տիկնիկային թատրոնի երիտասարդ դերասաններն են: Նախաձեռնության շրջանակում նրանք ցանկանում են հիշեցնել, որ թատերարվեստի բոլոր ներկայացուցիչները մեկ ընտանիք են և ամուր, հզոր են միասին: «Երաժշտական ողջույնը» շարունակական է լինելու:
Բաժանորդագրվեք մեր ալիքին Telegram-ում