Ադրբեջանը ԱԻՆ մեքենան խոցել է Չինարիի բնակչին օգնություն ցուցաբերելու ժամանակ
ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ։ Տավուշի մարզպետ Հայկ Չոբանյանը մանրամասներ ներկայացրեց Չինարի գյուղի բնակչի վիրավորման և ՀՀ արտակարգ իրավիճակների նախարարության մեքենան ԱԹՍ-ով հարվածելու դեպքերից։
«Չինարի բնակչի վիրավորումից հետո արդեն Արտակարգ իրավիճակների նախարարության տրանսպորտային միջոցը մոտեցել էր համապատասխան աջակցություն ցուցաբերելու քաղաքացուն. Ադրբեջանի կողմից թիրախավորվել է նաև ԱԻՆ մեքենան։ Եվ ռմբակոծումը իրականացվել է ԱԹՍ-ի միջոցով։ Չինարիում ունեցանք նման դեպք, այն էլ իրականացվել էր վիրավորին օգնություն ցուցաբերելու ժամանակ»,- «Արմենպրես»-ի հաղորդմամբ՝ հուլիսի 16-ին Իջևանում՝ ճգնաժամային տեղեկատվական կենտրոնում, տեղի ունեցած ճեպազրույցի ընթացքում ասաց Չոբանյանը։
Հուլիսի 16-ի վաղ առավոտյան Ադրբեջանի կողմից վերսկսվել էին Տավուշի սահմանամերձ գյուղերի ուղղությամբ հակառակորդի հրետակոծությունները։ Հիմնական թիրախ են եղել Այգեպար, Ներքին Կարմիրաղբյուր, Չինարի, Մովսես, Տավուշ գյուղերը և Բերդ քաղաքը։ Ադրբեջանի մարտական անօդաչուի հարվածից հուլիսի 16-ին վիրավորվել է Չինարի գյուղի մի բնակիչ: Չինարի գյուղի 48-ամյա բնակչի առողջական վիճակը բժիշկները նախնական գնահատում են կայուն ծանր։
Բաժանորդագրվեք մեր ալիքին Telegram-ում