Ժամանակը Երևանում՝ 11:07:36,   13 Հուլիս

Կանոնների պահպանումը կբերի ոչ միայն թվի նվազման, այլ նաև կօգնի հաղթահարել համաճարակը. Փաշինյան

Կանոնների պահպանումը կբերի ոչ միայն թվի նվազման, այլ նաև կօգնի հաղթահարել 
համաճարակը. Փաշինյան

ԵՐԵՎԱՆ, 29 ՄԱՅԻՍԻ, ԱՐՄԵՆՊՐԵՍ: ՀՀ ղեկավարությունը միանշանակ վստահ է, որ առաջարկված կանոնների ճշգրիտ և որակյալ պահպանումը ոչ միայն կբերի կորոնավիրուսի ընդհանուր թվի նվազեցման, այլև կօգնի ընդհանուր առմամբ հաղթահարել համաճարակը: «Արմենպրես»-ի հաղորդմամբ՝ պարետատան նիստից հետո առցանց ճեպազրույցում այս մասին ասաց ՀՀ վարչապետ Նիկոլ Փաշինյանը:

«Մենք մի քանի անգամ բազմակողմանի քննարկել ենք այն կանոնները, որ առաջարկում ենք ՀՀ քաղաքացիներին: Եվ մենք վստահ ենք՝ միանշանակ և աներկբա, 100 տոկոսով, որ այս կանոնների ճշգրիտ և որակյալ պահպանումը ոչ միայն կբերի ընդհանուր թվի նվազեցման, այլև մեզ կօգնի ընդհանուր առմամբ հաղթահարել համաճարակը: Համաճարակի հաղթահարման գործընթացը պայմանավորված է մեր կողմից առաջարկված կանոնների պահպանմամբ և դրանց որակով»,-ասաց Փաշինյանը:

Վարչապետը նաև նկատեց, որ հատկապես վերջին օրերին շատ է տարածվում միջազգային մամուլում մարտի 31-ից տեղ գտած տեղեկատվությունը, որ Առողջապահության համաշխարհային կազմակերպությունն այն ժամանակ հորդորել է դիմակ կրել հիվանդներին և հիվանդ խնամողներին: «Դա եղել է մարտի 31-ին, դա եղել է մի պայմաններում, երբ դիմակների համաշխարհային դեֆիցիտ կար: Եվ ընդհանուր առմամբ սա նաև ցույց է տալիս, որ քանի որ սա նոր տեսակի կորոնավիրուս է, նոր համաճարակ է, ամբողջ աշխարհում եղել է և ինչ-որ առումով կարող է լինել շփոթ՝ միջոցների արդյունավետության գնահատման վերաբերյալ: Եվ սա այն պարագան է, երբ ողջ մարդկությունը, մենք բոլորս իրար հետ սովորում ենք համավարակի դեմ արդյունավետ պայքարի միջոցները: Եվ այս շփոթը, որ գուցե ՀՀ քաղաքացիները նկատել են մեր երկրում, առկա է նաև ամբողջ աշխարհում և նախկինից դուրս բերված հաղորդագրությունները նույնպես վկայում են այդ մասին»,-ասաց Փաշինյանը:

Վարչապետը մեկ անգամ ևս շեշտեց՝ համոզված են, որ առաջարկած կանոնները պահպանելու դեպքում կորոնավիրուսի համաճարակի տեմպերը ոչ միայն կնվազեն, այլև կձգտեն զրոյի:

Հայաստանում մայիսի 29-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 8676 դեպք, որոնցից 3297-ն` առողջացածԿորոնավիրուսային հիվանդությամբ այս պահին փաստացի բուժում է ստանում 5214 պացիենտ: Ընդհանուր առմամբ, կատարվել է 56 042 թեստավորում: Ընդհանուր առմամբ, կորոնավիրուսային հիվանդությունից արձանագրվել է մահվան  120 դեպք

Աննա Գրիգորյան





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ