Արգենտինայի իշխանություններն ամբողջությամբ փակել են սահմանները. ՏԱՍՍ
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Արգենտինայի կառավարությունը սահմաններն ամբողջությամբ փակելու մասին որոշում է կայացրել՝պայմանավորված կորոնավիրուսի տարածմամբ: Դա վերաբերում է նաև երկրից դուրս գալուն: «Արմենպրես»-ի հաղորդմամբ, այս մասին տեղեկացնում է ՏԱՍՍ գործակալությունը:
«Ընդլայնել սահմանափակումը և տարածել նավահանգիստների, օդանավակայանների, ցամաքային սահմանային կետերի, Արգենտինայում բնակվողների և արտերկրում կեցության իրավունքով բնակվող արգենտինացիների վրա: Այդ սահմանափակման միջոցները կգործեն մինչևմարտի 31-ը ներառյալ»,-ասվում է հրամանագրում:
Նշվում է նաև, որ Ներքին գործերի նախարարությունը կարող է կրճատել կամ երկարաձգել սահմանափակման ժամկետը: Փակ սահմանները չեն վերաբերում արտաքին առևտրին:
Արգենտինայում կորոնավիրուսով վարակվածության առաջին դեպքը գրանցվել է մարտի 3-ին: Վերջին տվյալներով երկրում կորոնավիրուսի հաստատված 589 դեպք կա: Գրանցվել է մահվան 12 դեպք: Մարտի 20-ից երկրում հայտարարված է ընդհանուր կարանտին:
Բաժանորդագրվեք մեր ալիքին Telegram-ում