Վազգեն Սարգսյանի ծննդյան օրը ՀՀ նախագահ Արմեն Սարգսյանն այցելել է Եռաբլուր
ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: Սպարապետ Վազգեն Սարգսյանի ծննդյան օրը ՀՀ նախագահ Արմեն Սարգսյանն այցելել է Եռաբլուր: Նա ծաղիկներ է խոնարհել Վազգեն Սարգսյանի շիրմին և հարգանքի տուրք մատուցել նրա հիշատակին:
«Ես եկել եմ Եռաբլուր՝ իմ ընկերոջ Վազգեն Սարգսյանի ծննդյան օրվա առթիվ»,-նշել է Արմեն Սարգսյանը:
«Արմենպրես»-ի հաղորդմամբ, վաղ առավոտից Եռաբլուր են այցելում Վազգեն Սարգսյանի հարազատները, ընկերները, քաղաքական, հասարակական գործիչներ, ազատամարտիկներ, երկրապահ կամավորականներ, անհատներ:
Վազգեն Սարգսյանի եղբայր Արամ Սարգսյանը լրագրողների հետ զրույցում նշեց, որ սպարապետը մեծ ներդրում է ունեցել արցախյան պատերազմում, բանակի ձևավորման գործում:
«Նա իր ամբողջ կյանքը, գործունեությունը նվիրեց Արցախի խնդրին: Նա մինչև 1998 թվականի վերջը զինվոր էր: Վազգենին, իր կենդանության ժամանակ, ոչ ոք սպարապետ չէր կոչում, նա դա թույլ չէր տա, որովհետև համեստ մարդ էր: Երբեք իրեն չէր գերագնահատում, համարում էր, որ պատերազմին մասնակցած յուրաքանչյուրի ներդրման շնորհիվ ենք ունեցել հաղթանակ: Նա մի առիթով ասել էր՝ այս պատերազմին տվեցի այն, ինչ կարող էի ու ձեռք բերեցի հպարտություն: Հայոց պատմության մեջ մեծ ներդրում ունեցող մարդ է Վազգենը, և սերունդները պետք է դա գնահատեն: Մենք պետք է գնահատենք նաև մյուսներին, ովքեր իրենց կյանքը տվեցին, և նրանց, ովքեր իրենց ներդրումն ունեցան հաղթանակի գործում ու այսօր մեր կողքին են»,-ասաց Արամ Սարգսյանը:
1959 թ. այս օրը ծնվել է Վազգեն Սարգսյանը՝ ռազմական եւ քաղաքական գործիչ: Եղել է Հայաստանի Հանրապետության առաջին պաշտպանության նախարարը 1991-1992 թթ. եւ այնուհետեւ՝ 1995-1999-ին: Նաեւ եղել է Հայաստանի Հանրապետության վարչապետ 1999 թ. հունիսի 11-ից մինչեւ իր սպանության օրը՝ նույն թվականի հոկտեմբերի 27-ը: Նրան տրվել է Սպարապետ հերոսական պատվանունը, քանի որ մեծ ներդրում է ունեցել Հայաստանի անկախության, անվտանգության եւ Հայկական բանակի կայացման գործում: Վ. Սարգսյանին շնորհվել են Հայաստանի եւ Արցախի բարձրագույն՝ Հայաստանի ազգային հերոս եւ Արցախի հերոս կոչումները։
Բաժանորդագրվեք մեր ալիքին Telegram-ում