ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Ներպետական ուղևորափոխադրումների ոլորտում կարգավորումներ մտցնելու համար ՀՀ վարչապետ Կարեն Կարապետյանի հանձնարարականով կտարվեն աշխատանքներ, որովհետև այդ ոլորտում կան բազմաթիվ խնդիրներ: «Արմենպրես»-ի հաղորդմամբ` այդ մասին կառավարության նիստից հետո լրագրողների հետ զրույցում նշեց ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը:

Հարցին, թե ինչ մեթոդներով է կարգավորվելու միջհամայնքային տրանսպորտային ոլորտը, նախարարն ասաց. «Ներպետական ուղևորափոխադրումների ոլորտում բազմաթիվ խնդիրներ ունենք: Այստեղ մենք հասարակության օգնության կարիքն էլ ունենք, որ բոլորս կարողանանք դրա դեմ պայքարել»: Նախարարի խոսքով՝ պետք է առաջին հերթին հասկանալ, թե երթուղայիններն ի՞նչ ժամի են աշխատում:

Կառավարության նիստի ընթացքում ՀՀ վարչապետ Կարեն Կարապետյանը տրանսպորտի, կապի և տեղեկատվական տեխնոլոգիաների նախարարին, Տարածքային կառավարման և զարգացման նախարարությանը ու մարզպետներին հանձնարարեց ուսումնասիրել գյուղական բնակավայրերում տրանսպորտի հարցը՝ չսահմանափակվելով միայն Երևանին մոտ գյուղական բնակավայրերով։ Վարչապետը հանձնարարել էր ներկայացնել այն բնակավայրերի ցանկը, որտեղ տրանսպորտի աշխատանքը չի իրականացվում և նշել պատճառները: