ԵՐԵՎԱՆ, 26 ՄԱՅԻՍԻ, ԱՐՄԵՆՊՐԵՍ: Հայաստանի Հանրապետության նոր Ընտրական օրենսգիրքն ընդունվել է լայն կոնսոլիդացիայի արդյունքում: ՀՀԿ ԳՄ նիստից հետո լրագրողների հետ զրույցում այս մասին ասաց ՀՀԿ խոսնակ, ԱԺ փոխնախագահ Էդուարդ Շարմազանովը: «Ազգային ժողովի Հանրապետական խմբակցությունն ունի 70 պատգամավոր: Եթե մենք հաշվի առնենք, որ քվեարկության օրը մեր խմբակցությունից մի քանի պատգամավոր բացակայում էին, իսկ օրենսգիրքը երրորդ ընթերցմամբ ընդունվել է 102 կողմ ձայներով, ապա կարող ենք ասել, որ այն ընդունվել է լայն կոնսոլիդացիայի պայմաններում»,- «Արմենպրես»-ի հաղորդմամբ՝ նշեց Էդուարդ Շարմազանովը:

Նա հավելեց, որ Ընտրական օրենսգրքին երրորդ ընթերցմամբ կողմ քվեարկողներ եղել են Ազգային ժողովի բոլոր խմբակցություններից՝ բացի ՕԵԿ-ից: «ՀԱԿ-ից կողմ է քվեարկել Լյուդմիլա Սարգսյանը, «Ժառանգություն»-ից՝ Ռուբիկ Հակոբյանը և Ալեքսանդր Արզումանյանը, ԲՀԿ-ից մի քանի պատգամավոր ձեռնպահ է քվեարկել, իսկ մեծ մասը՝ կողմ, ՀՅԴ-ն ու ՀՀԿ-ն էլ, բնականաբար, կողմ են քվեարկել»,- ընդգծեց ԱԺ փոխնախագահը:

Նրա խոսքով՝ սա չի նշանակում, որ իշխանությունները պատրաստ չեն շարունակել քննարկումները իրենց ընդդիմադիր գործընկերների հետ՝ Ընտրական օրենսգրքի շուրջ ավելի լայն կոնսենսուս ապահովելու համար: