Հայաստանը շահագրգիռ է Գերմանիայի հետ հարաբերությունների խորացմամբ. Շարմազանով
ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ: Հայաստանը կարևորում է Գերմանիայի Դաշնային Հանրապետության հետ հարաբերությունների զարգացումը բոլոր ուղղություններով: «Արմենպրես»-ի հաղորդմամբ` այս մասին հայտարարեց Ազգային ժողովի փոխնախագահ Էդուարդ Շարմազանովը Գերմանիայի Բունդեսթագի փոխնախագահ Էդելգարդ Բուլմահնի հետ հանդիպումից հետո հրավիրված ասուլիսին: «Տիկին Բուլմահնը Հայաստան է եկել իմ հրավերով, այսօր տեղի ունեցան նրա հանդիպումները խորհրդարանում, մենք կներկայացնենք դրանց արդյունքները: Վաղը նա հանդիպումներ կունենա Արտաքին գործերի նախարարի ու Նախագահի հետ: Պետք է ասել, որ երկու կողմն էլ կարևորում են միջխորհրդարանական համագործակցությունը: Մենք կարևոր ենք համարում նաև երկկողմ հարաբերությունների զարգացումը Հայաստան-Եվրամիություն հարաբերությունների համատեքստում»,-ասաց Շարմազանովը:
Նա նկատեց, որ Գերմանիան ԵՄ անդամ այն երկրներից է, որը կարևոր գործընկեր է Հայաստանի Հանրապետության համար: «Ավելորդ չէ նշել, որ Գերմանիան ԱՄՆ-ից հետո համարվում է երկրորդ դոնոր երկիրը, ու բազմաթիվ ծրագրեր կան, որ նրանց օժանդակությամբ իրականանում են Հայաստանում»,-նշեց ԱԺ փոխնախագահը: Շարմազանովը տեղեկացրեց, որ գերմանացի իր գործընկերոջ հետ քննարկել են նաև Հայաստանում սահմանադրական բարեփոխումների անցկացման, դրանց արդյունքների, ժողովրդավարական բարեփոխումների շարունակական անցկացման վերաբերյալ հարցեր: «Ես վերահաստատել եմ, որ Հայաստանում ժողովորդավարական արժեքները, կոռուպցիայի դեմ պայքարն այլընտրանք չունեն: Հայաստանը պետք է անշեղորեն շարժվի ժողովրդավարության զարգացման ճանապարհով»,-հավելեց պատգամավորը:
Անդրադառնալով տարածաշրջանային հարցերին` Շարմազանովն ընդգծեց, որ տարածաշրջանային անվտանգության հիմնախնդրով մտահոգ Գերմանիայի ներկայացուցչին ինքը փոխանցել է տեսակետը, որ Հայաստանը բացառապես կայունության կողմնակից է: «Խոսք է գնացել նաև ապրիլյան քառօրյա պատերազմի մասին, նրան են ներկայացվել հստակ փաստեր Ադրբեջանի ագրեսիայի ու հանցագործությունների վերաբերյալ, այդ թվում` զինվորների ու խաղաղ բնակչության հանդեպ իրականացված խոշտանագումների մասին»,-տեղեկացրեց Շարմազանովը:
Կարևորելով Մինսկի խմբի ձևաչափով հակամարտության կարգավորման անհրաժեշտությունը` Շարմազանովը իր գործընկերոջը հույս է հայտնել, որ վստահության և մոնիտորինգի մեխանիզմների ներդրումը թույլ կտա առանց հավասարության նշան դնելու ասել, թե ով է խախտում հրադադարն ու խաթարում խաղաղությունը:
Բացի այդ` ԱԺ փոխխոսնակը շնորհակալություն է հայտնել Բունդեսթագի փոխանախագահին Հայոց ցեղասպանության բանաձևի շուրջ տարված աշխատանքների համար:
Բաժանորդագրվեք մեր ալիքին Telegram-ում