ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: ՌԴ-ի վարչապետ Դմիտրի Մեդվեդեւը ռուսական Սու-24 ինքնաթիռի վրա թուրքական ռազմաօդային ուժերի գրոհը որակել Է Ռուսաստանի դեմ ագրեսիայի գործողություն, որին ի պատասխան կկիրառվեն ռազմական, դիվանագիտական եւ տնտեսական բնույթի միջոցներ, տեղեկացնում Է «Արմենպրես»-ը՝ հղում անելով ՏԱՍՍ-ին:

«Դա, անտարակույս, ագրեսիայի գործողություն Է մեր պետության դեմ Թուրքիայի, մեր հարեւանի ու նաեւ Հյուսիսատլանտյան դաշինքի անդամի կողմից»,- ասել Է ՌԴ-ի կառավարության ղեկավարը՝ ելույթ ունենալով նախարարների կաբինետի նիստում:

«Այդ հանցագործության հակազդման ռազմական եւ դիվանագիտական միջոցներ արդեն եղել են եւ դեռ շարունակվելու են»,-ասել Է Մեդվեդեւը, հավելելով, որ կլինեն նաեւ տնտեսական միջոցներ:

Մեդվեդեւը նաեւ հայտարարել Է, որ ՌԴ-ի կառավարությունը Թուրքիայի նկատմամբ տնտեսական սահմանափակումների միջոցներ Է մշակում ռուսական Սու-24 ինքնաթիռի վրա թուրքական ռազմաօդային ուժերի գրոհին ի պատասխան, հայտնելով, որ նախօրյակին այդ հարցը քննարկել Է ՌԴ-ի նախագահ Վլադիմիր Պուտինի հետ:

«Արդյունքում՝ կառավարությանը հանձնարարվել Է ագրեսիայի ակտին հակազդելու համալիր միջոցների մշակել տնտեսական, հումանիտար ոլորտներում»,-ասել Է Մեդվեդեւը: Նրա խոսքով՝ որոշումները կընդունվեն հատուկ տնտեսական միջոցառումների վերաբերյալ 2006 թվականի օրենքի հիման վրա, որը նախատեսված Է նմանօրինակ իրավիճակների համար:

ՌԴ-ի վարչապետը երկու օր Է տվել Թուրքիայի դեմ սահմանափակիչ միջոցների վերաբերյալ առաջարկություններ պատրաստելու համար: Նա ընդգծել Է, որ այդ միջոցները չեն սահմանափակվելու որեւիցե ժամկետով: