ԵՐԵՎԱՆ, 25 ՆՈՅԵՄԲԵՐԻ, ԱՐՄԵՆՊՐԵՍ: Վերջին տարիներին հանրապետությունում գյուղացիական տնտեսությունների, վերամշակող ընկերությունների և արտահանողների միջև ստացված բերքի իրացման մասին պայմանագրերի կնքման ծավալներն ավելացել են: «Արմենպրես»-ի հաղորդմամբ` նոյեմբերի 25-ին լրագրողների հետ հանդիպմանն այս մասին ասաց ՀՀ գյուղատնտեսության նախարարի տեղակալ Ռոբերտ Մակարյանը:

«Բերքի իրացման մասին պայմանագրերի կնքումն իրականացվում է խնդիրներից խուսափելու համար, քանի որ պայմանագրերով գյուղացիական տնտեսություննները երաշխավորված իրացնում են իրենց բերքը, իսկ վերամշակողներն ունենում են երաշխավորված հումք:  Այսօրվա  դրությամբ կնքվել է 13 հազար 433 պայմանագրիր, որը գերազանում է նախորդ տարվա մակարդակը 11 տոկոսով»,- նշեց նախարարի տեղակալը` հավելելով, որ որքան շատ գյուղացիական տնտեսություններ պայմանագրեր կնքեն վերամշակող և արտահանող  ընկերությունների հետ, այնքան մթերման ընթացքում խնդիրները քիչ կլինեն:

Մակարյանը նշեց, որ արտադրողը պետք է նախապես իմանա ինչ է արտադրելու, արտահանողն ու մթերողն էլ պետք է իմանան, թե ինչ են մթերելու կամ արտահանելու: Պետք է գյուղացիական տնտեսությունների, վերամշակողների և արտահանողների միջև ձևավորվի պայմանագրային հարաբերությունների մշակույթ: