ԵՐԵՎԱՆ, 25 ՆՈՅԵՄԲԵՐԻ, ԱՐՄԵՆՊՐԵՍ: «Ռոսիա 1» հեռուստաալիքի «Երեկոն Վլադիմիր Սոլովեւի հետ» հեռուստաբանավեճի շրջանակում ՌԴ Լիբերալ դեմոկրատական կուսակցության առաջնորդ Վլադիմիր Ժիրինովսկին հայտարարել է, որ հայերին պետք է թույլ տալ ազատագրել իրենց արեւմտյան տարածքները:

Ինչպես հաղորդում է «Արմենպրես»-ը, նա ասել է, որ «հայերը դա կանեին 1918 թվականին, եթե Մոսկվան օգներ, սակայն, նա անցել էր Թուրքիայի կողմը»:

«Եթե մենք հայերին թույլ տանք ազատել իրենց արեւմտյան տարածքները, նրանք ուրախությամբ կազատագրեն», -ասել է նա:

Վլադիմիր Ժիրինովսկին խոսել է նաեւ քրդերին օգնելու մասին:

«Քրդերը սպասում են մեր օգնությանը, եթե մենք քրդերին ասենք, որ ճանաչում ենք իրենց անկախությունը: Նրանց թիվը, ինչպես հայտնի է, հասնում է 20 միլիոնի, իսկ մայրաքաղաքն արդեն հայտնի է,  որ Դիարբեքիրն է: Այսպիսով` Արեւելյան Անատոլիան կդադարի գոյութուն ունենալ ինչպես այդպիսին: Արդյունքում մենք կունենանք անկախ Քուրդիստան եւ Մեծ Հայաստան», -հայտարարել է Ժիրինովսկին: