Էջմիածնի 2700-ամյակը շնորհավորել են բազմաթիվ օտարերկրացի հյուրեր
ԷՋՄԻԱԾԻՆ, 8 ՀՈԿՏԵՄԲԵՐԻ, ԱՐՄԵՆՊՐԵՍ: Հայոց հոգեւոր մայրաքաղաքի` Էջմիածնի 2700-ամյակին նվիրված տոնակատարությանը մասնակցելու նպատակով Հայաստան են ժամանել բազմաթիվ հյուրեր, պատվիրակներ Էջմիածնի քույր քաղաքներից:
«Արմենպրես»-ի հետ զրույցում ՌԴ Սերգիեվ Պոսադի քաղաքապետ Յուրի Պոտյոմկինը շեշտում է, որ Էջմիածնի հետ հինգ տարվա համագործակցությունը եղել է արդյունավետ, ձեռքբերումները` շատ են, նախագծերը` նույնպես:
«Եկել եմ շնորհավորելու Էջմիածնի տոնը եւ նրան ու նրա քաղաքացիներին մաղթելու բարգավաճում»,- ասաց Պոտյամկինը:
Ֆրանսիական Իսսի լե Մուլինոյի հետ նույնպես Էջմիածինը քույր քաղաք է: Փոխքաղաքապետ Հարություն Խանջյանն էլ շեշտում է, որ Էջմիածինը սիրելի քաղաք է, ու ինքը տարեցտարի նկատում է, թե Հայոց հոգեւոր մայրաքաղաքն ինչպես է փոխվում եւ գեղեցկանում:
«Ձեր քաղաքը հայկական քաղաքակրթության օրրաններից մեկն է: Լուսավորության սկիզբն այս քաղաքից է սկսվել: Այստեղ է գտնվում ամենագեղեցիկ եկեղեցիներից մեկը` Մայր աթոռ Սուրբ Էջմիածինը»,- ասաց Հայաստանում ՌԴ դեսպան Իվան Վոլինկինը:
Հայաստանում Ռումինիայի դեսպան Սորին Վասիլեն էլ շեշտում է, որ Ռումինիայում շատ են սիրում եւ հարգում էջմիածնեցիներին, քանի որ Վազգեն Առաջին կաթողիկոսի շնորհիվ շատ բան են իմացել հայերի ու Էջմիածնի մասին:
«Եթե Երեւանը Հայաստանի սիրտն ու տնտեսությունն է, ապա Էջմիածինը` Հայաստանի հոգին է: Մաղթում եմ ձեզ ամենայն բարիք»,- ասաց Վասիլեն:
Տոնական հանդիսավոր նիստի ժամանակ Էջմիածնի մի խումբ քաղաքացիներ, Էջմիածնի ավագանու որոշմամբ, արժանացան պատվավոր քաղաքացու կոչմանը: Ավելի ուշ Էջմիածնի Մեսրոպ Մաշտոցի անվան հրապարակում տեղի ունեցավ տոնական շքերթ եւ թատերական ներկայացում:
Միջոցառումների եզրափակումը տեղի կունենա երեկոյան տոնական համերգով եւ հրավառությամբ:
Հոկտեմբերի 8-ը Էջմիածնի տոնն է, քանի որ համաձայն պատմագիրների վկայության, հենց այս օրն է Մեսրոպ Մաշտոցն իր աշակերտների հետ Վաղարշապատ բերել հայոց գրերը, որտեղ նրանց ցույց է տրվել փայլուն ընդունելություն: Հայոց մեծ լուսավորչին դիմավորելու համար նրան ընդառաջ է գնացել Վռամշապուհ թագավորը' հայոց ավագանու եւ ժողովրդի բազմության ուղեկցությամբ:
Բաժանորդագրվեք մեր ալիքին Telegram-ում