Պեկինում սաստիկ ծխամշուշի պատճառով վտանգի բարձր մակարդակ է հայտարարված
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Չինաստանի մայրաքաղաքում սաստիկ ծխամշուշի պատճառով հոկտեմբերի 7-ին վտանգի բարձր՝ «դեղին» մակարդակ է հայտարարված: Ինչպես հաղորդել է ՉԺՀ-ի պետական օդերեւութաբանական վարչությունը, վտանգի «դեղին» մակարդակ է հայտարարվել նաեւ հյուսիսչինական Տյանցզին քաղաքում, տեղեկացնում Է «Արմենպրես»-ը:
Պեկինի օդում առողջության համար վտանգավոր PM-2,5 մանր կարծր մասնիկների կուտակումն առավոտյան գերազանցել է 1 խորանարդ մետրի հաշվով 300 միկրոգրամը, իսկ քաղաքի առանձին շրջաններում օդի մոնիթորինգի կայանները այդ ցուցանիշը գրանցել են 390 միկրոգրամի նշագծին: Առողջապահության համաշխարհային կազմակերպության կողմից հաստատված նորմերի համաձայն՝ օդում PM-2,5 մասնիկների պարունակության օրական անվտանգ նորման չպետք է գերազանցի 25 միկրոգրամը:
Օդի աղտոտվածության բարձր մակարդակի կապակցությամբ Պեկինի իշխանությունները երեխաներին, տարեցներին եւ շնչառական հիվանդություններ ունեցող անձանց խորհուրդ են տվել խուսափել երկար ժամանակ փողոցում մնալուց:
Չինաստանում PM-2,5 մասնիկների հիմնական աղբյուրներն են՝ ավտոտրանսպորտը եւ ածխով աշխատող էլեկտրակայանները, հաղորդել է ՏԱՍՍ-ը:
Լուսանկարը` AP
Բաժանորդագրվեք մեր ալիքին Telegram-ում