Սիրիական Սուեյդա քաղաքում ահաբեկչության զոհերի թիվը հասել է 26-ի
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Սիրիական Սուեյդա քաղաքում տեղի ունեցած ահաբեկչությունների հետևանքով զոհերի թիվը հասել է 26-ի: Ինչպես հաղորդում է «Արմենպրես»-ը, վկայակոչելով սիրիական ՍԱՆԱ գործակալությունը, այս մասին տեղեկացնում է Սուեյդա քաղաքի ոստիկանությունը: Ահաբեկիչները սեպտեմբերի 4-ին երկու ականապատ մեքենաներ են պայթեցրել քաղաքում, որի հետևանքով զոհվել է 26 մարդ, կան երկու տասնյակից ավելի վիրավորներ:
Պայթյունները մեծ նյութական վնասներ են պատճառել ազգային հիվանդանոցին, մոտակայքում գտնվող շինություններին և մի շարք մեքենաների:
Սիրիայի կառավարությունը խստորեն դատապարտել է Սուեյդա քաղաքում տեղի ունեցած ահաբեկչությունները, որոնց հետևանքով տասնյակ անմեղ բնակիչներ են տուժել: Կառավարությունը ցավակցություն է հայտնել զոհերի ընտնաիքներին, իսկ վիրավորներին շուտափույթ ապաքինում մաղթել` ավելացնելով, որ սիրիական ազգը կշարունակի պայքարել ահաբեկչության դեմ:
Սիրիական բանակն արդեն չորս տարի անընդմեջ պայքար է մղում տասնյակ զինված խմբավորումների դեմ՝ փորձելով երկրում վերականգնել կայունությունն ու անվտանգությունը: ՄԱԿ-ի տվյալներով, սիրիական հակամարտության զոհերի թիվը գերազանցել է 220 հազարը:
Բաժանորդագրվեք մեր ալիքին Telegram-ում