Գյուղատնտեսության նախարարը Կոտայքի մարզում խնձորի առատ բերք է կանխատեսում
ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ: ՀՀ գյուղատնտեսության նախարար Սերգո Կարապետյանն օգոստոսի 26-ին աշխատանքային այց կատարեց Կոտայքի մարզում, որի ընթացքում նախ եղավ Ալափարս համայնքում` ծանոթանալու համար ազնվամորու աճեցման տնտեսության աշխատանքներին, ապա` Նոր Գեղի համայնքի խնձորի այգիներում և ծանոթացավ նոր ջերմոցների կառուցման ընթացքին, իսկ Աբովյան քաղաքում այցելեց «Առողջ սունկ»-ի արտադրամաս:
Լրագրողների հետ զրույցում նախարարը նշեց, որ այս տարի Կոտայքի մարզում առատ բերք է սպասվում: «Կարելի է ասել, որ այս տարին խնձորի տարի է, որովհետև շատ լավ բերք կա, մարզն էլ նպաստավոր է խնձորի աճեցման համար, քանի որ գտնվում է նախալեռնային գոտում: Իսկ Կոտայքում ամենամեծ ձեռքբերումը ես համարում եմ հողերի մշակության ծավալների աճն այս տարի, որոնք վերջին 10 տարում ավելացել են 1000 հեկտաով: Ես համոզված եմ, որ այս տարվանից սկսած ամեն տարի մշակվող հողերի տարածքներն ավելանալու են»,- հավելեց Սերգո Կարապետյանը:
«Արմենպրես»-ի հաղորդմամբ` Սերգո Կարապետյանն ընդգծեց, որ մարզում ջերմոցային տնտեսությունների թվի ավելացում է գրանցվում: Միայն այս տարի 50 հա հողատարածքի վրա նոր ջերմոցային տնտեսությունններ են ստեղծվել, իսկ 20 հեկտարի վրա դեռ կառուցվում են: Մարզում նաև պտղատու այգիներ են հիմնվել վերջին 2 տարում` մոտ 1000 հեկտարի վրա:
«Կոտայքի մարզում արդեն ավարտվել է ցորենի բերքահավաքն ու անցյալ տարվա համեմատ ավելի շատ բերք է ստացվել, քանի որ 900 հեկտար հացահատակային մշակաբույսերի ցանքեր էին ավելացել,- հայտնեց նախարարը` հավելելով, որ մարզը բոլոր առումներով լավ ցուցանիշներ ունի:
Բաժանորդագրվեք մեր ալիքին Telegram-ում