Հայտնի են գեղարվեստական մարմնամարզության ՀՀ թիմային և անհատական առաջնության հաղթողները
ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ: Հայաստանի հավաքական թիմերի մարզական կենտրոնում անցկացվել է գեղարվեստական մարմնամարզության ՀՀ թիմային և անհատական առաջնությունը, որին մասնակցել են 55 մարզուհիներ՝ Երևանի վարչական շրջաններից, Կապան և Գյումրի քաղաքներից:
Թիմային պայքարում հաղթող է ճանաչվել Գեղարվեստական մարմնամարզության և ակրոբատիկայի օլիմպիական մանկապատանեկան մարզադպրոցի թիմը, 2-րդ տեղն է զբաղեցրել Գյումրու մարզական բարձրագույն վարպետության դպրոցի թիմը, իսկ 3-րդ տեղը՝ Երևանի Կենտրոնի մանկապատանեկան համալիր մարզադպրոցի թիմը:
«Արմենպրես»-ի հաղորդմամբ` անհատական պայքարի ամփոփիչ` «Սպորտի վարպետ» ձևում 1-ին տեղում Լիլիթ Հարությունյանն էր, 2-րդը` Միլենա Հովհաննիսյանը և եռյակի վերջում`Ռիմա Հովհաննիսյանն ու Սոնա Հարությունյանը: Իսկ ահա սպորտի վարպետի թեկնածուի ծրագրում 1-ին տեղում Ռոզա Ադամյանը և Լիլի Հակոբջանյանն են, 2-րդ և 3-րդ տեղերը համապատասխանաբար զբաղեցրել են Լիդիա Նազարյանը և Էմմա Պետրոսյանը:
Բաժանորդագրվեք մեր ալիքին Telegram-ում