«Գեղարեգ» ՀԿ-ի ապագա զինվորներն այցելեցին սահմանամերձ զորամաս եւ պաշտպանական դիրքեր
ԳԱՎԱՌ, 27 ՀՈՒԼԻՍԻ, ԱՐՄԵՆՊՐԵՍ: Գավառ քաղաքում գործող «Գեղարեգ» ՀԿ-ի մի խումբ պատանի կամավորներ «Ես էլ եմ զինվոր» ծրագրի շրջանակներում այցելեցին Տավուշի մարզում տեղակայված սահմանամերձ զորամաս եւ պաշտպանական դիրքեր: Ինչպես «Արմենպրես»-ին տեղեկացրեց «Ես էլ եմ զինվոր» ծրագրի ղեկավար Գրիգոր Դաշտոյանը, զորամասում հայոց բանակի ապագա զինվորները հանդիպեցին զինվորականների`պայմանագրային եւ ժամկետային զինծառայողների հետ, շրջեցին զորամասում, ծանոթացան բանակային առօրյային, նորակոչիկների հետ ճաշեցին եւ մասնակցեցին շարային պատրաստության դասերի, ինքնաձիգն ինքնուրույն քանդեցին ու հավաքեցին: Այլ խոսքով` պատանիներն ու երիտասարդները մեկ օր ապրեցին որպես զինվորներ: «Զորամասում անցկացրած մեկ օրը ապագա զինվորների համար դարձավ ռազմահայրենասիրական դաս, որով նրանք հասկացան, թե մեր տղաներն ինչ պայմաններում եւ ինչպես են իրականացնում հայրենի երկրի պաշտպանությունը»,-նշեց Գրիգոր Դաշտոյանը: Լինել հայ-ադրբեջանական սահմանի հենակետերում, կրել սահմանապահի հանդերձանք ու զգալ երկրի պահապանի հպարտությունը. այս զգացողությամբ էին համակվել «Գեղարեգ»-ի կամավորները, ովքեր հնարավորություն ունեցան լինել նաեւ մարտական հենակետում եւ բացահայտել առաջնագծի ծառայության հետաքրքրություններն ու գաղտնիքները: «Կարծում եմ, որ մեր ապագա զինվորները, գտնվելով անմիջապես հայ-ադրբեջանական սահմանի շփման գծում, հոգեպես ավելի ուժեղացան ու կոփվեցին` թե՛ որպես որպես ապագա զինվորներ, թե՛ որպես ապագա զինվորի մայրեր ու զինվորին սպասողներ»,-ամփոփեց ծրագրի ղեկավարը: «Ես ել եմ զինվոր» ծրագիրն իրականացվում է ՀՀ Նախագահի գործընկեր կազմակերպության՝ Հայաստանի երիտասարդական հիմնադրամի հայտարարած դրամաշնորհային մրցույթի շրջանակներում:
Խոսրով Խլղաթյան
Բաժանորդագրվեք մեր ալիքին Telegram-ում