ԹԲԻԼԻՍԻ, 7 ՀՈՒԼԻՍԻ, ԱՐՄԵՆՊՐԵՍ: Հայոց Ցեղասպանության 100-րդ տարելիցի ոգեկոչման միջոցառումների շրջանակում Վիրահայոց թեմի նախաձեռնությամբ վիրահայերը երկօրյա ուխտագնացություն են կատարել դեպի Արևմտյան Հայաստանի պատմական վայրեր: Ինչպես «Արմենպրես»-ին փոխանցեցին Վիրահայոց թեմի մամուլի ծառայությունից, ուխտագնացության նպատակն էր ոտք դնել այն հողին, որտեղից սրով ու հրով վտարվել են մեր նախնիները, խոնարհվել Ցեղասպանության նահատակների հիշատակի առջև ու իրականացնել փրկված նախնիների անկատար փափագը՝ քայլել 100 տարի առաջ կորցրած հայրենի երկրում:

Ուխտագնացության ընթացքում վիրահայերն այցելել են Կարսի բերդ, Անի: Տեր Նարեկ քահանա Ղուշչյանի գլխավորությամբ հայ հավատացյալները աղոթք արեցին Կարսի 10-րդ դարի Սուրբ Առաքելոց Եկեղեցում, իսկ Անիի Սուրբ Գրիգոր Լուսավորիչ եկեղեցում կատարված հոգևոր աղոթքից հետո ուխտավորները ստացան նաև սուրբ հաղորդություն:

Հայոց ցեղասպանության 100-րդ տարելիցի շրջանակներում Վիրահայոց թեմում շարունակելու է կազմակերպել նմանատաիպ ուխտագնացություններ դեպի Արևմտյան Հայաստան: