Իրանն ու Ադրբեջանը պաշտպանության ոլորտի հանձնաժողով կստեղծեն
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ: Հաշվի առնելով Իրանի եւ Ադրբեջանի միջեւ հարաբերությունների բարձր մակարդակն՝ Իրանի պաշտպանության նախարար Հուսեյն Դեհղանի այցը Բաքու ավելի կամրապնդի երկու երկրների միջեւ ռազմավարական համագործակցությունը:
Այս մասին, ինչպես հաղորդում է «Արմենպրես»-ը` վկայակոչելով report.az լրատվական կայքը, հայտարարել է Ադրբեջանում Իրանի դեսպան Մոհսեն Թաք Այինը` մեկնաբանելով Ադրբեջանի պաշտպանության նախարար Զաքիր Հասանովի հրավերով Իրանի ՊՆ ղեկավարի ապրիլի 20-21-ին Ադրբեջան կատարած այցը:
Դեսպանը հայտնել է, որ այցի ընթացքում որոշում է ընդունվել երկու երկրների միջեւ պաշտպանական ոլորտում համատեղ հանձնաժողով ստեղծելու մասին:
«Հանձնաժողովը ղեկավարելու են Իրանի եւ Ադրբեջանի պաշտպանության նախարարները: Հաննձաժողովի հիմնական գործառույթը հանդիսանալու է պաշտպանական ոլորտում երկու երկրների միջեւ առաջարկությունների քննարկումը», - ասել է իրանցի դեսպանը:
Նա հավելել է, որ Հ.Դեհղանի Բաքու այցի կարեւոր հարցերից մեկն էլ անվտանգության հարցերի քննարկումն էր:
«Կարծիքներ են փոխանակվել ահաբեկչական կազմակերպությունների դեմ, ինչպիսին է «Իսլամական պետություն» խմբավորումը, պայքարի շուրջ: Որոշվել է պայմաններ ստեղծել արմատականության դեմ պայքարի գծով համատեղ քայլեր իրականացնելու համար», -նշել է դեսպանը:
Բաժանորդագրվեք մեր ալիքին Telegram-ում