Սամբոյի Եվրոպայի առաջնության ժամանակ Ադրբեջանի հիմնի փոխարեն հնչել է Հայաստանի օրհներգը
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: Սերբիայի Նովի սադ քաղաքում մեկնարկած Եվրոպայի սամբոյի պատանեկան ու երիտասարդական առաջնության մրցումային առաջին օրը մեր մարզիկներից չորսն արժանացան մեդալների: Պատանիներից Դանիել Գաբրիելյանը (60կգ) և երիտասարդներից Արման Նիազյանը (48կգ) արժանացան բրոնզե մեդալների, իսկ Վոլոդյա Սարգսյանը (62 կգ) և Միշա Նազարյանը (82կգ) հասան եզրափակիչ, սակայն գրավեցին երկրորդ տեղն ու արժանացան արծաթե պարգևների: «Արմենպրես»-ի հաղորդմամբ, այս մասին տեղեկացնում է Հայաստանի սամբոյի ֆեդերացիան:
Պարգևատրման արարողության ընթացքում մի զավեշտալի դեպք արձանագրվեց: Երիտասարդների 62 կգ քաշային կարգում ի պատիվ հաղթող Քամրան Ասքարովի Ադրբեջանի հիմնի փոխարեն հնչել է Հայաստանի պետական օրհներգը: Թյուրիմացությունը շտկվել է րոպեներ անց, երբ մարզիկներն արդեն իջել էին պատվանդանից:
Հայաստանի մյուս մարզիկները մրցագորգ դուրս կգան ապրիլի 18-ին և 19-ին:
Լուսանկարը`Հայաստանի սամբոյի ֆեդերացիայի ֆեյսբուքյան էջից
Բաժանորդագրվեք մեր ալիքին Telegram-ում