ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանն ապրիլի 16-ին հանդիպել է Կոնրադ Ադենաուեր «Քաղաքական երկխոսություն. Հարավային Կովկաս» տարածաշրջանային ծրագրի տնօրեն Ջանան Աթիլգանի հետ: Հանդիպմանը ներկա է եղել նաեւ լրագրող, Կոնրադ Ադենաուեր հիմնադրամի գնահատող Սիլվիա Շթոբեռը: Ինչպես «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, հիմադրամի տնօրեն Ջանան Աթիլգանը ներկայացրել է հիմնադրամի ծրագրերը եւ դրանցում առաջարկել խորհրդարանականների մասնակցությունը եւ աջակցությունը:

Սիլվիա Շթոբեռը՝ որպես լրագրող, հետաքրքրվել է տարածաշրջանային իրավիճակով, Հայաստան-Եվրամիություն հարաբերություններով, ինչպես նաեւ Եվրասիական տնտեսական միությունում Հայաստանի մասնակցությունից եւ դերակատարությունից եւ Հայոց ցեղասպանության 100-րդ տարելիցին նվիրված միջոցառումներից ու դրանց արձագանքներից:

Հանդիպման ընթացքում կողմերը քննարկել են նաեւ Գերմանիայի եւ Հայաստանի միջեւ խորհրդարանական համագործակցությանը վերաբերող հարցեր: