Մարիինյան թատրոնի բեմից հնչել են Կոմիտասի ստեղծագործությունները
ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: Սանկտ Պետերբուրգի Մարիինյան թատրոնում տեղի ունեցավ Հայոց ցեղասպանության 100-րդ տարելիցին նվիրված համերգ: Ինչպես հաղորդում է «Արմենպրես»-ի թղթակիցը Սանկտ Պետերբուրգից, համերգի շրջանակներում հնչել են Կոմիտասի ստեղծագործությունները:
Հանդիսատեսը ջերմ ծափահարություններով էր արձագանքում նվագախմբի յուրաքանչյուր կատարմանը: Ապա հնչեցին Կարլ Էմանուիլ Բախի ֆլեյտայի և լարային նվագախմբի, Սեբաստիան Բախի նվագախմբի և դաշնամուրի համար գրած ստեղծագործությունները, Չայկովսկու «Խորհրդածությունները»:
Համերգի եզրափակիչ մասում առաջին անգամ հնչեց Գևորգ Պելեցիսի «Աշուղի ասքը՝ ալտի , դուդուկի և լարային նվագախմբի համար» ուշագրավ, խորը հուզականության ստեղծագործությունը:
Համերգին մասնակցեցին Պոլինա Օսետինսկայան (դաշնամուր), Մարիա Ֆեդոտովան (ֆլեյտա), Մաքսիմ Նովիկովը (ալտ), Կարեն Սարգսյանը (դուդուկ) և Մարիինյան թատրոնի լարային նվագախումբը՝ Անտոն Գակելի գլխավորությամբ:
Բաժանորդագրվեք մեր ալիքին Telegram-ում