ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: ՀՀ քննչական կոմիտեի Տավուշի մարզային քննչական վարչությունում ավարտվել է Նոյեմբերյանում ոսկյա զարդերի խանութի վրա ավազակային հարձակում կատարելու դեպքի առթիվ հարուցված քրեական գործի նախաքննությունը, որի շրջանակներում մեղադրանք է առաջադրվել երկու անձի։

Ինչպես «Արմենպրես»-ին տեղեկացրին ՀՀ քննչական կոմիտեի տեղեկատվության և հասարակայնության հետ կապերի բաժնից, նախաքննության ընթացքում պարզվել է, որ Տաշիր քաղաքի բնակիչ, 24-ամյա Տ.Յարատովը, նախնական պայմանավորվածության գալով Ստեփանավանի բնակիչ Ա.Գուրոկլյանի հետ, 2014 թվականի օգոստոսի 13-ին, ժամը 10:08-ին մուտք է գործել Նոյեմբերյանի բնակչուհի, անհատ ձեռնարկատեր Ա.Զալինյանին պատկանող ոսկյա զարդերի խանութ։ Որսորդական դանակի գործադրմամբ կյանքի եւ առողջության համար վտանգավոր բռնություն գործադրելու սպառնալիքով Տ.Յարատովը հարձակվել է վաճառողուհու վրա և պահանջել հանձնել ոսկյա զարդերը, իսկ Ա.Գուրոկլյանը հսկել է խանութի շրջակայքը։ 

Հանդիպելով վաճառողուհու դիմադրությանը՝ առերեւույթ հանցագործությու կատարած անձինք դիմել են փախուստի։ 

Ձեռք բերված ամացույցների համակցությամբ Տ.Յարատովին առաջադրվել է մեղադրանք ՀՀ քրեական օրենսգրքի 175-րդ հոդվածի 2-րդ մասի 1-ին, 4-րդ կետերի և 235-րդ հոդվածի 4-րդ մասի հատկանիշներով, իսկ Ա.Գուրոկլյանին՝ ՀՀ քրեական օրենսգրքի 175-րդ հոդվածի 2-րդ մասի 1-ին, 4-րդ կետերով:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին, ով հաստատել է մեղադրական եզրակացությունը եւ գործն ուղարկել դատարան։

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։