ԳԱՎԱՌ, 27 ՓԵՏՐՎԱՐԻ, ԱՐՄԵՆՊՐԵՍ: Գեղարքունիքի մարզի Լճաշեն գյուղում արդեն երրորդ տարին է, ինչ գործում է նույն գյուղի ձեռներեց Վանիկ Սարգսյանին պատկանող կաթի վերամշակման արտադրամասը, որտեղ այսօր աշխատանքային այցով գտնվեց ՀՀ գյուղատնտեսության նախարար Սերգո Կարապետյանը: «Արմենպրես»-ի տեղեկացմամբ` նախարարը տեղում ծանոթացավ արտադրամասի շենքային պայմաններին, արտադրական հզորություններին, տեսականուն եւ իրացման հետ կապված խնդիրներին: 

Ինչպես  ներկայացրեց Վանիկ Սարգսյանը, ձեռնարկությունը մթերում եւ վերամշակում է Սեւանի տարածքի համայնքների անասնապահական տնտեսությունների արտադրած կաթը, որը ձմռան ամիսներին օրական կազմում է երկու, ամռան ամիսներին` չորս հազար լիտր: Մթերված կաթից ստացվում է պանիր, մածուն, թթվասեր, այլ մթերքներ, որոնք վաճառվում են տեղական շուկայում: Այստեղ ստեղծվել է 12 մշտական աշխատատեղ:

Ձեռնարկությունը զարգանալու եւ ընդլայնվելու խնդիր եւ ցանկություն ունի, որի համար զգում է աջակցության կարիք, ինչը եւ խոստացավ ցուցաբերել ՀՀ գյոուղատնտեսության նախարար Սերգո Կարապետյանը` ՀՀ գյուղնախարարության «Համայնքների գյուղատնտեսական ռեսուրսների կառավարման եւ մրցունակության ծրագրի» երկրորդ փուլի շրջանակներում` պայմանով, որ ձեռնարկատերը որոշակիորեն բարելավի արտադրամասի շենքային պայմանները եւ կատարի համաֆինանսավորում: «Այդ դեպքում ձեռնարկությունը ծրագրի գրասենյակի կողմից կստանա 50 հազար դոլար արժողությամբ կաթի վերամշակման նորագույն սարքավորումներ»,- հավաստեց Սերգո Կարապետյանը:

Խոսրով Խլղաթյան