Շեքսպիրի հիմնած «Գլոբուս» թատրոնը կայցելի Հայաստան
ԵՐԵՎԱՆ, 5 ՓԵՏՐՎԱՐԻ, ԱՐՄԵՆՊՐԵՍ: Ուիլիամ Շեքսպիրի ծննդյան 450-ամյակին նվիրված համաշխարհային շրջագայության շրջանակներում բրիտանական «Գլոբուս» թատրոնն այս տարի կայցելի Հայաստան: Ինչպես «Արմենպրես»-ը տեղեկացավ Շեքսպիրի հիմնած «Գլոբուս» թատրոնի պաշտոնական կայքից, համաշխարհային ճանաչում ունեցող թատերախումբը Հայաստանում ելույթ կունենա այս տարվա հոկտեմբերին:
Թատերախմբի տասնվեց անդամները «Համլետ» ներկայացմամբ՝ "Globe to Globe. Hamlet" խորագրով համաշխարհային շրջագայությունն են իրականացնում: Թատերախումբն իր շրջագայությունն սկսել է անցած տարվա ապրիլից և արդեն այցելել է եվրոպական երկրներ, Ռուսաստան, Կենտրոնական և Հարավային Ամերիկա, Աֆրիկա: Իսկ հոկտեմբերին, բացի Հայաստանից, թատերախումբը կլինի նաև Վրաստանում, Ադրբեջանում, Ղրղզստանում, Տադջիկստանում:
Բաժանորդագրվեք մեր ալիքին Telegram-ում