ԵՐԵՎԱՆ, 26 ՀՈՒՆՎԱՐԻ, ԱՐՄԵՆՊՐԵՍ: Թուրք հայտնի պատմաբան Բասքըն Օրանը Թուրքիայի նախագահ Ռեջեփ Թայիփ Էրդողանի կողմից ապրիլի 24-ին Չանաքքալեի հաղթանակի տոնակատարությունների կազմակերպելը խիստ ամոթալի է համարել:

Ինչպես հաղորդում է «Արմենպրես»-ը, այս մասին պատմաբանը գրել է «Ռադիկալ» պարբերականում հրապարակված հոդվածում:

Օրանն անդրադարձել է այն բանին, որ ամեն տարի մարտի 18-ին նշվող Չանաքքալեի տոնակատարությունները կլինեն ապրիլի 24-ին, երբ նշվում է իթթիհատական մսագործների կողմից հայ քաղաքացիների նկատմամբ արված սարսափելի կոտորածը խորհրդանշող օրը: «Հայտնի լրագրող Ռոբերտ Ֆիսկը Independent պարբերականում այսպես է գրում. «Սպանված 1,5 միլիոն հայերի ուրվականները նրանց հետ կքայլեն»: Ավելի լավ է գետնի տակն անցնենք: Եթե անգամ անտեսում ենք այդ մարդկանց ցավերը, գոնե չծաղրենք դրանք: Էրդողանը, ով նախորդ տարի ասում էր. «Ցանկանում ենք, որ 20-րդ դարի սկզբին եղող պայմաններում զոհված հայերը հանգստության մեջ հանգչեն, նրանց թոռներին մեր ցավակցությունն ենք ուղղում», այժմ վեր է կացել և Հայաստանի նախագահ Սարգսյանին ապրիլի 24-ին Չանաքքալե է հրավիրում: Սա ի՞նչ է, այս ի՞նչ ամոթ է»,- ասել է Օրանը` կատարվածն իսկական խայտառակություն անվանելով: