Բերիո թեմի առաջնորդն ԱՄՆ-ում այցելել է Վահան և Անուշ Շամլյան ազգային վարժարան
ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Պաշտոնական այցելությամբ ԱՄՆ-ում գտնվող Բերիո թեմի առաջնորդ Տ. Շահան Արք. Սարգիսյանը և ԱՄՆ-ի Արևմտյան թեմի առաջնորդ Տ. Մուշեղ Արք. Մարտիրոսյանը ազգային վարչության փոխատենապետ դոկտ. Տիգրան Պապիկյանի ընկերակցությամբ այցելել են Վահան և Անուշ Շամլյան ազգային վարժարան, որտեղ նրանց ջերմորեն դիմավորել են տնօրինությունը, անձնակազմը և աշակերտները:
Այս մասին «Արմենպրես»-ը տեղեկացավ «Բերիո Լուրեր» ֆեյսբուքյան էջից: Վարժարանի տնօրենի և փոխտնօրենի ընկերակցությամբ նրանք այցելել են վարժարանի բաժիններ, ապա հանդիսասրահում աշակերտները գեղեցիկ միջոցառումով պատվել են հարգարժան հյուրերին: Իրենց ողջույնի խոսքն են ասել վարժարանի տնօրենը, աշակերտական խորհրդի նախագահը:
Շահան Սրբազանը բարձր է գնահատել աշակերտների և ուսուցիչների կեցվածքը՝ նշելով հայ կրթական հաստատությունների դերն ու կարևորությունը մեր մշակույթի պահպանման և նոր սերնդի դաստիարականության գործում: Նա նկարագրել է այն տխուր վիճակը, որը տիրում է Հալեպի հայկական դպրոցներում և աշակերտներին հորդորել է փառք տալ Աստծուն, որ ապրում են հանգիստ պայմաններում: «Դուք վայելում եք բազմաթիվ բարիքներ, լավ կլինի որ դրանցից բաժին հատկացնեք Սիրիայի ձեր քույրերին ու եղբայրներին»,-նշել է Սրբազանը: Արևմտյան թեմի առաջնորդը բարձր է գնահատել ընդունեությունը և աշակերտների պատրաստած միջոցառումը: Նա շեշտել է Շահան Սրբազանի այցելության կարևորությունը՝ բացատրելով, թե ինչպիսի դաժան պայմաններում է դպրոց հաճախում Հալեպի հայ աշակերտը: Նա կոչ է արել միասնաբար բացականչել. «Մենք են սիրիահայ աշակերտները»:
Այցելությունն ավարտվել է Սրբազան Հայրերի աղոթքով: Շահան Սրբազանին հանձնվել է հուշանվեր:
Բաժանորդագրվեք մեր ալիքին Telegram-ում