ԳԱՎԱՌ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի համայնքներում որսորդները ձեռնամուխ կլինեն գայլերի որսին, որն արդեն թույլատրվել է կառավարության որոշմամբ: Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմից, ՀՀ բնապահպանության նախարարության միջոցներով յուրաքանչյուր խփված գայլի համար որսորդները ստանալու են 100 հազար դրամի պարգեւավճար:

Մարզպետարանի աշխատակազմի գյուղատնտեսության եւ բնապահպանության վարչության միջոցով արդեն համայնքներին փոխանցվել է Գեղարքունիքի մարզպետ Ռաֆիկ Գրիգորյանի ցուցում-հանձնարարականը` գայլերի որս սկսելու ուղղությամբ: Գայլերի դեմ պայքարը հրատապ խնդիր է դարձել Գեղարքունիքում, որտեղ միայն սեպտեմբերի ընթացքում արդեն 3 համայնքներում գրանցվել է գայլերի հարձակման  դեպք ` տնտեսութուններին պատճառած խոշոր չափի վնասներով:

ՀՀ կառավարությունը սեպտեմբերի 18-ին որոշում է ընդունել և 2014թ. ընթացքում որսված գայլերի դիմաց պարգևատրման գումար վճարելու ծախսը փոխհատուցելու համար ՀՀ բնապահպանության նախարարությանը հատկացրել 20 մլն դրամ: Էկոլոգիական հավասարակշռությունը վերականգնելու համար որսաշրջանի ընթացքում նախատեսվում է որսալ 200 գայլ, ինչը կապահովի տվյալ միջոցառման արդյունավետությունը:

Խոսրով Խլղաթյան