Իրաքում մզկիթի վրա հարձակման հետևանքով 68 մարդ է զոհվել
ԵՐԵՎԱՆ, 22 ՕԳՈՍՏՈՍԻ, ԱՐՄԵՆՊՐԵՍ: Իրաքի մայրաքաղաքից հյուսիս-արևելք ընկած Դիյալա մարզում մզկիթի վրա հարձակման հետևանքով առնվազն 68 մարդ է զոհվել: Ինչպես հաղորդում է «Արմենպրես»-ը՝ վկայակոչելով ԻՏԱՌ-ՏԱՍՍ-ը, այս մասին հաղորդել է «Ալ Արաբիա» հեռուստաընկերությունը:
Քաթարյան «Ալ Ջազիրա» հեռուստաընկերության տեղեկություններով` մզկիթի վրա հարձակման հետևանքով 50 մարդ է զոհվել, ևս 30 մարդ վիրավորվել է: Այս պահին հայտնի չէ, թե ով է հարձակում գործել մզկիթի վրա:
Իրաքյան լրատվամիջոցները հաղորդում են, որ սունիների մզկիթը հարձակման է ենթարկվել շիա զինյալների կողմից, ովքեր մեծ ազդեցութուն ունեն Իրաքի այդ հատվածում, հատկապես վարչական կենտրոն Բաակուբա քաղաքում:
Հայտնի է նաև, որ առաջինը մզկիթ է ներխուժել մահապարտ ահաբեկիչը, ով գործի է դրել մարմնի վրա ամրացված պայթուցիկ սարքը, այնուհետև մզկիթ են ներխուժել ինքնաձիգներով զինված անհայտ անձինք: Զոհերի մեծ քանակությունը բացատրվում է նրանով, որ աղոթքի պահին հավատացյալները չեն կարողացել արագ դուրս գալ փակ տարածքից:
Բաժանորդագրվեք մեր ալիքին Telegram-ում