ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: ԱՄՆ-ի նախագահ Բարաք Օբաման ժամանակավորապես ընդհատում է իր արձակուրդը եւ վերադառնում Սպտակ տուն մի շարք աշխատանքային հանդիպումներ անցկացնելու համար: Այս մասին հաղորդել է Սպիտակ տան մամուլի ծառայությունը, տեղեկացնում է «Արմենպրես»-ը:

Ենթադրվում է, որ մայրաքաղաքում նա կմնա երկու օր, ինչից հետո կվերադառնա Մասաչուսեթսի նահանգի Մարտաս Վինյարդ կղզու պերճաշուք առողջարան, որտեղ շարունակում է հանգստանալ նրա ընտանիքը:  

Օբաման իր օգնականների հետ կքննարկի Իրաքի իրադրությունը, ինչպես նաեւ Միսուրիի նահանգի իրավիճակը, որտեղ Ֆերգյուսոն քաղաքում արդեն մի քանի օր Է, ինչ չեն հանդարտվում դեռահասի մահվան կապակցությամբ բողոքի ակցիաները:

Մեկնաբանները չեն բացառում, որ Օբաման վաղօրոք Է որոշում կայացրել ընդհատելու արձակուրդը՝ խուսափելու համար ընդդիմադիրների կողմից քննադատությունից, որոնցից շատերը նախագահին մեղադրում են, որ նա հանգստանում Է այն պահին, երբ միջազգային իրադրությունը շիկացած Է, իսկ ներքին հիմնախնդիրներն սպառնում են վերաճել լուրջ ճգնաժամի, հաղորդել Է ԻՏԱՌ-ՏԱՍՍը: