Տավուշի ՊՄՊ մարզային ծառայությունը Դանիելի խաչ եկեղեցու դեպքով դիմել է ոստիկանություն
ԵՐԵՎԱՆ, 1 ՕԳՈՍՏՈՍԻ, ԱՐՄԵՆՊՐԵՍ: Պատմամշակութային արգելոց-թանգարանների և պատմական միջավայրի պահպանության ծառայություն ՊՈԱԿ-ի Տավուշի ՊՄՊ մարզային ծառայության հուշարձանի պահապանը հուլիսի 29-ին հուշարձանի տարածք կատարած հերթական շրջայցի ժամանակ արձանագրել է, որ այրվել է Իջևանից 6 կմ հեռավորության վրա գտնվող Դանիելի խաչ եկեղեցու դռան մի հատվածը:
Ինչպես «Արմենպրես»-ին տեղեկացրին Պատմամշակութային արգելոց-թանգարանների և պատմական միջավայրի պահպանության ծառայությունից, կատարվածի մասին հուշարձանի պահապանը զեկուցել է ՊՄՊ մարզային ծառայության պետին: Վերջինս, չբացառելով դիտավորության հանգամանքը և նկատի ունենալով, որ հուշարձանի նկատմամբ իրավախախտում է տեղի ունեցել, հուլիսի 30-ի առավոտյան գրավոր դիմել է ՀՀ ոստիկանության Տավուշի մարզային վարչության Իջևանի բաժին` միջոցներ ձեռնարկելու և կատարվածի հանգամանքները պարզելու համար:
Կատարվում է քննություն: Քննությունն իրականացնող մարմինը վնասի չափը հստակեցնելու նկատառումով կդիմի լիազոր մարմնին: Կձևավորվի համապատասխան մասնագիտական հանձնաժողով` հուշարձանին պատճառված վնասի չափը գնահատելու համար:
12-14-րդ դարերի Դանիելի խաչ եկեղեցին գտնվում է Իջևանի գերեզմանոցի մոտ և գործող եկեղեցի չէ:
Բաժանորդագրվեք մեր ալիքին Telegram-ում